पाल्पा, बुटवलबाट पाल्पा घुम्न आएका एक युवकको पोखरीमा डुवेर मृत्यु भएको छ । आज विहान नयाँ वर्ष मनाउन पाल्पाको तिनाउ गाउँपालिका–३ भूतखोलास्थित पोखरीमा घुम्न आएका सिद्धार्थनगरपालिका–१२ बेलहियाका २० वर्षीय शिवम जैशवाल ढुङ्गामा चिप्लिई पोखरीमा खसेर डुबेका थिए ।

पोखरीमा डुवेका उनलाई तत्काल प्रहरी चौकी दोभानबाट खटिएको प्रहरी टोलीले उद्दार गरी बुटवलको लुम्बिनी प्रादेशिक अस्पताल पठाइएको थियो ।जैशवालको उपचारका क्रममा चेकजाँच गर्दा डाक्टरले मृत घोषणा गरेको जिल्ला प्रहरी कार्यालय पाल्पाले जनाएको छ ।

उनी भैरहवाबाट साथीहरुसँगै घुम्न आएका थिए । घटनाका विषयमा थप अनुसन्धान भइरहेको जिल्ला प्रहरी कार्यालय पाल्पाका सूचना अधिकारी वीरेन्द्र थापाले जानकारी दिए । यहाँ यसअघि पनि घुम्न आउने केहीले डुवेर ज्यान गुमाउनु परेको छ ।