पाल्प, नेपाल पत्रकार महासंघ पाल्पा शाखाले दीप प्रज्वलन गरी विश्व प्रेस स्वतन्त्रता दिवस मनाएको छ । महासंघले आज साँझा तानसेनस्थित शितलपाटीमा दीप प्रज्वलन गरी दिवस मनाएको हो ।

दीप प्रज्वलन कार्यक्रममा शाखाका पूर्व अध्यक्ष गोविन्द भट्टराईले पछिल्लो समय पत्रकारहरु असुरक्षित रहेको बताएका छन् । उनले समाचार लेखेकै भरमा पत्रकारहरुलाई धम्की आउने, आक्रमण हुने जस्ता गतिविधिहरु भएकाले स्वतन्त्र र निष्पक्ष भएर काम गर्ने वातावरण सरकारले सिर्जना गरिदिनुपर्नेमा जोड दिए ।

शाखा अध्यक्ष रेखीराम रानाले राज्यले पूर्ण प्रेस स्वतन्त्रताको ग्यारेन्टी गरिनुपर्ने बताए । नेपाल प्रेस युनियनका केन्द्रीय उपाध्यक्ष माधव अर्यालले विगतमा भएका गतिविधिहरुको समीक्षा गरेर अगाडि बढ्नुुपर्ने धारणा व्यक्त गरे । महासंघका उपाध्यक्ष भरत शर्माले श्रमजीवी पत्रकारको अधिकार संरक्षणका लागि सबै एक भएर अगाडि बढ्नुपर्ने बेला आएको बताए । कार्यक्रममा जिल्लाका क्रियाशिल पत्रकारहरुको उपस्थिती रहेको थियो । महासंघका सचिव यज्ञमूर्ति तिमिल्सीनाको सञ्चालनमा कार्यक्रम भएको थियो ।