पाल्पा, जिल्लाको माथागढी गाउँपालिका –४ देवगीरमा युवाहरुलाई क्षमता विकास तालिम दिइएको छ । गाउँपालिकाको  आर्थिक सहयोग  र वडा कार्यालयको आयोजनामा ३ दिनसम्म युवाहरुलाई तालिम दिइएको हो । 

तालिम समापनमा प्रमुख अतिथि तथा गाउँपालिकाका अध्यक्ष यमबहादुर चिदीले युवाहरुको क्षमता विकासको लागि तालिम महत्वपूर्ण हुने बताए । उनले युवाहरुमा अन्र्तनिहित क्षमता हुँदा हुँदै  कलाको विकास नहुँदा धेरै युवाहरु पछि परेको भन्दै यस्ता तालिमले क्षमताको विकासमा टेवा पुुग्ने विश्वास व्यक्त गरे । 
 अध्यक्ष चिदीले पालिका भित्रका सबै वडामा युवा लक्षित तथा क्षमता विकासका  विभिन्न कार्यक्रमहरु सञ्चालन गरिदै आइएको र आगामी दिनमा पनि सञ्चालन गरिने बताए । 

वडाका युवाहरुको क्षमता विकास गराउने उद्देश्यले सञ्चालन गरिएको तिन दिने तालिमले युवाहरुको नेतृत्व क्षमता विकास गर्नेमा वडा अध्यक्ष शंकर दर्लामीले विश्वास व्यक्त गरे । उनले तालिममा सिकेको कुराहरुलाई व्यवहारमा उतार्न समेत तालिममा सहभागीहरुलाई आग्रह गरे ।

तालिमको युवा तथा खेलकुद समन्वय समितिको सहकार्यमा पत्रकार  दिपक भट्टराई र सामाजिक स्रोत विकास केन्द्र नेपालका कार्यक्रम संयोजक शिव शंकर न्यौपानेले सहजिकरण गरेका थिए । तालिम अवधिभर सिकेका कुरा तथा तालिमका बारेमा सहभागीका तर्फबाट अर्जुन रतन र लक्ष्मी सारुले तालिम एकदमै राम्रो तथा प्रभावकारी भएको बताउदै तालिम बाट धेरै कुरा सिक्ने अवसर पाएको धारणा राखेका थिए । पालिकाले आगामी दिनमा यस्ता तालिमलाई निरन्तता दिएमा थप सिक्ने मौक्का मिल्नेमा आशावादी रहेको उनीहरुले बताए । तालिममा वडा भित्रका ३५ जनाको  सहभागी रहेको थियो । वडा अध्यक्ष शंकर दर्लामीको अध्यक्षता,  प्रिति बिकको सञ्चालनमा समापन कार्यक्रम भएको थियो ।