पाल्पा, लुम्बिनी प्रदेशका विभिन्न ठाउँमा भएका दुर्घटनामा दुई जनाको मृत्यु भएको छ । प्रदेशका रूपन्देही, दाङमा भएका छुट्टाछुट्टै घटनामा दुई जनाको मृत्यु भएको हो ।

केन्द्रीय प्रहरी समाचार कक्षका अनुसार रूपन्देहीको तिलोत्तमा नगरपालिका–१ डाईभर टोलमा स्कुटर दुर्घटना हुदा चालकको मृत्यु भएको छ । लु.५४ प ५६९३ नम्बरको स्कुटर आफै अनियन्त्रित भई बुधबार बिहान दुर्घटना हुँदा चालक मंगलापुरका २६ वर्षीय सावन थापाको मृत्यु भएको हो । दुर्घटनामा गम्भीर घाइते भएका उनको क्रिमसन अस्पताल मणिग्राममा उपचारको क्रममा मृत्यु भएको प्रहरीले जनाएको छ । अन्य एक जनाको सोही अस्पतालमा उपचार भइरहेको छ ।

यस्तै दाङको शान्तिनगर गाउँपालिका–५ रतभटुवास्थित सडकमा मोटरसाईकल दुर्घटना हुँदा चालकको मृत्यु भएको छ ।  रा.३ प ४३२५ नम्बरको मोटरसाइकल आफैं अनियन्त्रित भई  दुर्घटना हुँदा चालक सोही ठाउँका १४ वर्षीय सुनिल विकको मृत्यु भएको हो । दुर्घटनामा गम्भीर घाइते भएका उनको मेडिकल कलेज कोहलपुरमा उपचारको क्रममा मृत्यु भएको केन्द्रीय प्रहरी समाचार कक्षले जनाएको छ ।