पाल्पा, विगतमा सम्भावना हुँदा हुँदै ओझेलमा परेको पाल्पाको रैनादेवी छहरा गाउँपालिका–४ स्थित महीपोखरी डाँडा यतिबेला आकर्षक धार्मिक पर्यटकीय स्थलका रुपमा विकास हुँदै गएको छ । आर्घाखाँचीको सन्धिखर्कस्थित खाँचीकोटमा रहेको सुपा देउराली मन्दिरको घण्टा महीपोखरी जंगलमा राखी देवीको पुजाआजा गर्न थालेपछि यहाँ धार्मिक पर्यटकहरुको घुइँचो लाग्न थालेको पाइन्छ । विगतमा छहरा, मेहलढाप, सल्लेधारावासीको रोजाई मात्र बनेको यो डाँडा अहिले सबै क्षेत्र, वर्गका लागि धार्मिक पर्यटकीय स्थलका रुपमा विकसित हुन पुगेको हो ।

लामाधामी गर्दै आएका अर्घाखाँची ढाकावनका देवबहादुर नेपालीलाई सुपा देउराली भगवतीदेवी उत्रिएपछि सुपा देउराली मन्दिरमा गई पुजापाठ गर्दै आएका थिए । देवबहादुरलाई नै सुपा देउराली भगवती देवीले मलाई यहाँ अशान्ति भयो, शान्त स्थानमा लैजाउ भनेर दिव्यदर्शन दिएपछि, उनी मन्दिरको घण्टा लिएर सुपादेवीलाई शान्त स्थान खोज्दै हिडेका थिए । लामा नेपाली सुपा देउरालीको घण्टा बोकेर देवीलाई शान्त स्थानमा राख्ने अभियानमा छहरातर्फ आउँदै गर्दा  उनी सवार जिप महीपोखरीमा अचानक रोकिन पुगेको थियो । जिप एक्कासी रोकिन पुगेपछि यात्रुहरुले हल्लाखल्ला गर्न थाले । लामा देवबहादुर भने हल्लिदै  मेरा लागि यही जंगल उपयुक्त स्थान छ, म यही बस्छु भनि बके पछि त्यहाँ घण्टा राखेर पुजाआजा गर्न थालिएको  मन्दिर व्यवस्थापन समितिका अध्यक्ष नलबहादुर रानाले बताए । उनका अनुसार पुस २३ ,२०७९ देखि यहाँ सुपा देउरालीदेवीको पुजाआजा गर्न थालिएको हो । स्थानीयवासीले सुपा देउराली देवीको वास भएपछि पुजाआजासँगै प्रचार–प्रसार गर्न थालेपछि अहिले महीपोखरी डाँडामा भक्तजनहरुको दैनिक भिड लाग्ने गरेको छ । भक्तजन बढेपछि स्थानीयवासीको अगुवाईमा मन्दिर व्यवस्थापन समिति निर्माण गरी अहिले यहाँ सुपा देउराली मन्दिर निर्माण तथा भौतिक पूर्वाधार निर्माणको काम भइरहेको छ । मन्दिर निर्माण, भक्तजनको लागि खानेपानी, शौचालय, देवीको लागि बली चढाउने स्थान, भक्तजनको लागि मन्दिरमा जाने बाटोघाटो निर्माणको काम भइरहेको समितिले जनाएको छ । 

रैनादेवी छहरा गाउँपालिकाले यहाँ मन्दिर निर्माण तथा अन्य भौतिक पूर्वाधार निर्माणको लागि गत वर्ष ३ लाख र चालु आर्थिक वर्षमा ५ लाख रुपैयाँ विनियोजन समेत  गरेको  छ । यस क्षेत्रलाई धार्मिक पर्यटकीय स्थलका रुवमा विकास गर्ने गरी आगामी दिनमा समेत बजेट विनियोजन गर्दै जाने गाउँपालिकाका अध्यक्ष रुक्मा·त भट्टराईले बताए । मन्दिरलाई थप व्यवस्थित गर्दै यस क्षेत्रलाई धार्मिक पर्यटकीय क्षेत्रको रुपमा विकास गर्ने गरी पालिकाले योजना बनाउने उपाध्यक्ष युवराज थापाले बताए । महीपोखरी क्षेत्रमा हालै स्थापना गरिएको सुपा देउराली मन्दिरलाई राम्रो बनाउन विगत दुई वर्षदेखि पालिकाबाट बजेट विनियोजन गरिएको र आगामी दिनमा योजनाबद्ध रुपमा काम गरिने प्रमुख प्रशासकीय अधिकृत कृष्णप्रसाद तिमिल्सीनाले बताए । महीपोखरी सुन्दर, शान्त र मनमोहक  रहेको छ । अहिले देवीको बासस्थानको रुपमा विकास भएकाले पनि सबै मिलेर यस क्षेत्रको विकासमा लाग्नुपर्ने स्थानीय रामबहादुर सोमरेले बताए । आउँदो बैशाख महिनामा मन्दिरको निर्माण कार्य पुरा गरी उद्घाटन गर्ने गरी मन्दिर निर्माणको काम भइरहेको मन्दिर निर्माण समितिका अध्यक्ष टेकराज पोखरेलले बताए । मन्दिर स्थापनासँगै पालिकादेखि देश विदेशबाट सहयोग  जुट्दै गएको छ । सहयोगलाई व्यवस्थित बनाउन बैक खाता खोलेर आम्दानी खर्चलाई व्यवस्थित बनाउँदै लगिएको मन्दिर व्यवस्थापन समितिका अध्यक्ष रानाले बताए । सुपा देउरालीको मुख्य मन्दिर अर्घाखाँचीको सन्धिखर्क नगरपालिका–७ र शितगंगा नागरपालिका–२ को सिमान खाँचीकोटमा रहेको छ । सुपा देउरालीको मन्दिर वि.स १६०० सालमा खाँचीकोटका राजा विश्वपालले छोरी सुवर्णकुमारीको नाममा निर्माण गरी भगवती देवीको स्थापना गरिएको विभिन्न इतिहासमा उल्लेख छ । सुपा देउरालीको दर्शन गर्न दैनिक हजारौ भक्तजन पुग्ने र वार्षिक एक करोडको हाराहारीमा दानभेटी रकम संकलन हुने गरेको छ ।