पाल्पा, रत्न श्रेष्ठ पुरस्कार गुठी बागलुङले २०७९ सालको जगत्–चन्द्र स्मृति राष्ट्रिय पुरस्कार चोलेश्वर शर्माको “सगरमाथा एक पहाडको नाम होइन” निबन्ध सङ्ग्रहलाई प्रदान गर्ने भएको छ । मोफसलको सबैभन्दा पुरानो पुरस्कार गुठी रत्न श्रेष्ठ पुरस्कार गुठीका संरक्षक प्रेम छोटाका अनुसार हरेक दुई/दुई वर्षमा प्रदान गरिँदै आएकोमा २०७९ देखि पुरस्कार प्रत्येक वर्ष प्रदान गरिने व्यवस्था मिलाइएको हो । 

माता रत्नकुमारी श्रेष्ठको नाममा २०३३ सालमा गुठी स्थापना गरी २०३४ सालदेखि उत्कृष्ट कृतिलाई पुरस्कार दिने व्यवस्थाको आरम्भ गरिएको यस संस्थाले विभिन्न शीर्षकका पुरस्कारहरु प्रदान गर्दै आएको छ । यस वर्ष रत्न श्रेष्ठ राष्ट्रिय पुरस्कार महावीर पुनको जीवनीमा आधारित कृतिलाई, जगत्–चन्द्र स्मृति राष्ट्रिय पुरस्कार पाल्पाका चोलेश्वर शर्माको “सगरमाथा एक पहाडको नाम होइन” कृतिलाई र उत्कृष्ट विद्यार्थीलाई प्रदान गरिने गुरुगणेश विष्णु स्मृति पुरस्कार पर्वत जिल्लाका रामकृष्ण सुवेदीलाई प्रदान गर्ने भएको छ । हरेक वर्ष फागुन ७ गते प्रजातन्त्र दिवसका दिन प्रदान गरिने व्यवस्था रहे पनि यस वर्ष विशेष कारणले केही ढिला हुन गएको पुरस्कार अर्पण कार्यक्रम चैत्र महिनामा सारिएको हो ।