पाल्पा, नेपाली काँग्रेसका केन्द्रीय सदस्य तथा प्रतिनिधि सभा सदस्य डा. चन्द्र भण्डारीले नेपाली काँग्रेस पाल्पाका पूर्व सभापति तथा प्रजातन्त्र सेनानी स्व.ठाकुर चन्द्र (विप्र) कोइरालाको निष्ठानको राजनीति कायम राख्ने बताएका छन् । बधुबार नेपाली काँग्रेस पाल्पाले स्व. कोइरालाको निवास तानसेन –६ बर्तुङ्गमा सातौं दिनको पूण्य तिथिमा आयोजना गरेको श्रद्धाञ्जली सभालाई सम्बोधन गर्दै उनले यस्तो बताएका हुन् ।
नेता भण्डारीले पार्टी र लोकतान्त्रिक आन्दोलनमा स्व. कोइरालाले खेलेको भूमिकाको स्मरण गर्दै काँग्रेसले विप्रको निष्ठानको राजनीतिक कायम राख्ने उल्लेख गरे । स्व. कोइराला आफ्नो दृष्टिकोणबाट कहिले पनि विचलित नभएको नेताको रूपमा स्मरणीय रहेको भन्दै उनले अहिलेका नेताहरूले धेरै कुरा सिक्नुपर्ने बताए । नेता भण्डारीले सत्य र निष्ठाको प्रतीक भएको चर्चा गर्दै उनको योगदानको काँग्रेसले अनुसरण गर्ने र उनको सपना साकार पार्नेतर्फ लाग्नुपर्नेमा जोड दिए ।
कार्यक्रममा नेपाली काँग्रेसका पूर्व केन्द्रीय सदस्य राजन प्रसाद पन्तले सँंगै जेल जीवन बिताउँदा विप्रलाई राम्रोसँग चिनेको भन्दै संगठन निर्माणमा उनले खेलेको भूमिका महत्वपूर्ण रहेको बताए । उनले भने ‘दाइ क्रान्तिकारी हुनुहुन्थ्यो, उहाँले समाज परिवर्तन गर्नुपर्छ भन्ने पक्षमा सधै वकालत गर्नु भयो ।’
काँग्रेस पाल्पाका निवर्तमान सभापति तथा लुम्बिनी प्रदेशका सांसद वीरबहादुर रानाले अत्यन्त सरल, इमान्दार र लोभलालचबाट टाढा रहने कोइरालाबाट नेताहरुले पाठ सिक्नुपर्ने धारणा व्यक्त गरे । उनले सत्कर्मको फल स्वरुप दाइको निधन सहज भएको बताए । नेता रानाले भने ‘मृत्यु स्वाभाविक हो तर त्यो कस्तो हो भन्ने कुरा महत्वपूर्ण रहन्छ, लोकतान्त्रिक अवस्थाको जनताले अनुभुती गर्न पाएका छैनन् । उनले देखाएको बाटो काँग्रेसले अवलम्बन गर्नुपर्छ ।’ राप्रपाका केन्द्रीय सदस्य नारायण कोइरालाले समाज परिवर्तनमा कोइराला क्रान्तिकारी स्वाभवका रहेको बताए । सोही अवसरमा काँग्रेसका पूर्व जिल्ला सचिव यमलाल तिमिल्सिनाले स्व. विप्रको जीवनीका बारे चर्चा गरेका थिए । पाटी जिल्ला सभापति हिमालदत्त श्रेष्ठको अध्यक्षता, सचिव सुनिता अधिकारीको सञ्चालनमा कार्यक्रम भएको थियो । सभामा काँग्रेसका नेताहरुको उल्लेखीय सहभागीता रहेको थियो ।
