पाल्पा, देशका विभिन्न स्थानमा भएका छुट्टछुट्टै सवारी दुर्घटनामा चार जनाको मृत्युु भएको छ । केन्द्रीय प्रहरी समाचार कक्षका अनुसार कपिलवस्तु, मोरङ र झापामा भएका छुट्टाछुट्टै सवारी दुर्घटनामा चार जनाको मृत्यु भएको हो ।  

कपिलवस्तुको यसोधरा गाउँपालिका–७ सोमढीहस्थित सडकमा मोटरसाइकल एक आपसमा ठक्कर खाई दुुर्घटना हुँदा एक जनाको मृत्युु भएको छ ।

लु.५५ प ३७३४ नम्बरको मोटरसाइकल र युपि ५५ एके ३५७५ नम्बरको मोटरसाइकल एकआपसमा ठक्कर खाई दुर्घटना हुँदा लु.५५ प ३७३४ नम्बरको मोटरसाइकल चालक यसोधरा गाउँपालिका–८ सिंहखोर बस्ने ३१ वर्षीय सब्दान हुसेन चौधरीको मृत्यु भएको हो । दुर्घटनामा गम्भीर घाइते भएका उनको जिल्ला अस्पताल तौलिहवामा उपचारको क्रममा मृत्यु भएको प्रहरीले जनाएको छ । दुर्घटनामा घाइते भएका युपि ५५ एके ३५७५ नम्बरको मोटरसाइकल चालकको सोही अस्पतालमा उपचार भइरहेको छ । 

यस्तै झापाको शिवसताक्षी नगरपालिका–१ कमलपुलस्थित सडकमा बोलेरो पिकअप र  मोटरसाइकल दुर्घटना हुँदा एक जनाको मृत्यु भएको छ । प्रदेश १–०१–००१ च ८२२१ नम्बरको बोलेरो पिकअप र मे.६ प २५१४ नम्बरको मोटरसाइकल एकआपसमा ठक्कर खाई बुधबार बिहान दुर्घटना हुँदा मोटरसाइकल चालक सोही नगरपालिका–८ बस्ने ४० वर्षीय ललित बहादुर थापाको मृत्यु भएको हो । दुर्घटनामा गम्भीर घाइते भएका उनको बिएण्डसी अस्पताल बिर्तामोडमा उपचारको क्रममा मृत्यु भएको जनाइएको छ । पिकअप चालकलाई प्रहरीले नियन्त्रणमा लिएको छ ।  यस्तै मोरङ, बुढिगंगा गाउँपालिका–५ गाउँपालिकाको भवन नजिक सडकमा साइकल दुर्घटना हुँदा  एक जनाको मृत्यु भएको छ । दुर्घटना हुँदा साइकलयात्री सोही गाउँपालिका–५ बस्ने २५ वर्षीय जलेश्वर सरदारको मृत्यु भएको हो । दुर्घटनामा गम्भीर घाइते भएका उनको बिराट टिचिङ अस्पताल गंगाचोकमा उपचारको क्रममा मृत्यु भएको प्रहरीले जनाएको छ । मोरङकै सुन्दरहरैंचा नगरपालिका–१० बागझोडास्थित सडकमा मोटरसाइकलको ठक्करबाट पैदलयात्रीको मृत्यु भएको छ । प्र.१–०२–०४६ प ३२१२ नम्बरको सोही नगरपालिका–१० बस्ने ६४ वर्षीया सीता गुरागाईको मृत्यु भएको हो । दुर्घटनामा गम्भीर घाइते भएकी उनको नोबेल अस्पताल विराटनगरमा उपचारको क्रममा मृत्यु भएको जनाइएको छ । मोटरसाइकल चालकलाई प्रहरीले नियन्त्रणमा लिएको छ ।