पाल्पा, नेपाल लोकतान्त्रिक खेलकुद संघ पाल्पाको अध्यक्षमा रूपेश महर्जन नियुक्त भएका छन् । उनलाई मंगलबार लोकतान्त्रिक खेलदकुद संघका केन्द्रीय अध्यक्ष देवेन्द्र कुमार शेरचनले खेलकुद संघको विधान २०७९ को भाग ६ को २४ बमोजिम पाल्पा जिल्लाको अध्यक्षको रुपमा नियुक्त गरेका हुन् ।
संघको अनुुशासन र मर्यादामा रही संघलाई चुस्त र दुरुस्त रुपमा अगाडि बढाउने अपेक्षासहित महर्जनलाई अध्यक्षमा नियुक्त गरिएको संघका केन्द्रीय अध्यक्ष शेरचनले बताए । संघको केन्द्रीय समितिले महर्जनलाई पाल्पा अध्यक्षमा नियुक्त गरेको पत्र नेपाली काँग्रेस केन्द्रीय कार्यालय, नेपाली काँंग्रेस केन्द्रीय खेलकुद विभाग र नेपाली काँग्रेस पाल्पालाई बोधार्थ गरेको छ ।
नेपाली काँग्रेस पाल्पाका सभापति हिमालदत्त श्रेष्ठले नेपाल लोकतान्त्रिक खेलकुद संघ पाल्पाको अध्यक्षमा महर्जनलाई नियुुक्त गरेको पत्र पार्टीलाई प्राप्त भएको र बुुधबार उनलाई एक कार्यक्रमका बिच हस्तान्तरण गरिएको जानकारी दिए । उनले अध्यक्ष महर्जनले खेल क्षेत्रको विकासका माध्यमबाट पार्टी संगठनलाई थप बलियो र मजबूद बनाएर लैजान महत्वपूर्ण भूमिका खेल्नेमा विश्वास व्यक्त गरे ।
जिल्ला अध्यक्षमा नियुक्त भएका महर्जनले जिल्लाको खेल र पर्यटन क्षेत्रमा महत्वपूर्ण योगदान पुर्याउदै आएका छन् । सामाजिक र राजनीतिक क्षेत्रमा समेत सक्रिय उनी पाल्पा साइकिलिङ्ग संघका अध्यक्ष समेत हुन् । महर्जन नेपाल तरूण दल पाल्पाका वर्तमान कोषाध्यक्ष,बुद्विचाल संघ पाल्पाका पूर्व अध्यक्ष एवं पाल्पाका पूूर्व फुटबल खेलाडी पनि हुन् । अध्यक्षमा नियुक्त भएसँगै उनले जिल्लाको खेलकूद क्षेत्रको विकामा आफु इमान्दार र सक्रिय भएर लाग्ने बताएका छन् । उनले सुस्ताउदै गएको खेलका गतिविधिहरुलाई चलायमान बनाउँदै दक्ष र अब्बल खेलाडी उत्पादन गर्ने दिशामा लाग्ने समेत बताए ।
