पाल्पा, पत्रकारहरुको छाता संगठन नेपाल पत्रकार महासंघ पाल्पामा नयाँ नेतृत्वको लागि निर्वाचन भएको छ । शुक्रबार तानसेनमा भएको निर्वाचनबाट नेपाल प्रेस  युनियन र प्रेस चौतारी नेपालको संयुक्त प्यानल नै विजयी भएको छ । संयुक्त प्यानलबाट अध्यक्षमा उम्मेदवारी दिएका प्रेस चौतारीका कमलराज तिमिल्सेनाको अध्यक्षतामा महासंघको नयाँ नेतृत्व चयन भएको हो ।

यहाँ अध्यक्ष, सचिव र  दलित सदस्यका लागि निर्वाचन भएको थियो । जसमा संयुक्त प्यानलतर्फका उम्मेदवार तिमिल्सेनाले कूल खसेको ६५ मत मध्ये ५२ मत ल्याई  विजयी भएका हुन् । उनका निकटतम प्रतिस्पर्धी प्रेस सेन्टरका  कृष्ण दर्नालले ११ मत प्राप्त गरेका थिए । यसैगरी महासंघको सचिवतर्फ भएको निर्वाचनमा संयुक्त प्यानलका उम्मेदवार रामचन्द्र रायमाझीले ४९ मत प्राप्त गरी विजयी भए । उनका निकटतम प्रतिस्पर्धी स्वतन्त्र पत्रकार संघ पाल्पाका अध्यक्ष समेत रहेका भोजराज भट्टराईले १३ मत प्राप्त गरी उपविजेता बने । यसैगरी खुल्ला  दलित सदस्यतर्फ हरिबहादुर विक निर्वाचित भएका छन् । उनले ५० मत प्राप्त गरी विजयी भए भने प्रेस सेन्टरका  डोलबहादुर विकले १० मत प्राप्त गरी उपविजेता भएको निर्वाचन समितिका संयोजक  तथा पत्रकार महासंघ पाल्पाका  पुर्व सभापति गोविन्द भट्टराईले जानकारी दिए ।

अन्य पदमा भने यस अघि नै निर्विरोध भइसकेका छन् । महासंघको उपाध्यक्षमा खुलातर्फ मुक्तिप्रसाद न्यौपाने, महिलातर्फ बन्दना पोखरेल, सहसचिवमा खुलातर्फ दुर्गेश मल्ल, सहसचिवमा समावेशीतर्फ दानबहादुर हिस्की, कोषाध्यक्षमा विजय वौडेल निर्वाचित भएका छन् । यसैगरी सदस्यमा नेत्र गैरे, दयाराज न्यौपाने, सुनिल कार्की, दिपक ढुङ्गाना, सुशीला रेग्मी, हरिबहादुर बिक र धनबहादुर रहेका छन् । यसैगरी केन्द्रीय परिषद् सदस्यमा यज्ञमूर्ति तिमिल्सिना, राजेन्द्र लिगल, सीता डोटेल निर्विरोध निर्वाचित भएका छन् । यसैगरी प्रदेश परिषद् सदस्यमा कृष्णप्रसाद पोख्रेल, दीपक भट्टराई, इमानसिंह राना र पवित्रा घिमिरे निर्वाचित भएका छन् । निर्वाचनमा कुल ६९ जना मतदाता मध्ये ६५ जना अर्थात् ९४ दशमलव २० प्रतिशतले मतदान गरेका निर्वाचन समितिका संयोजक गोविन्द भट्टराईले जानकारी दिए ।