पाल्पा, देशका विभिन्न स्थानमा भएका छुट्टाछुट्टै सवारी दुर्घटनामा पाँच जनाको मृत्यु भएको छ । केन्द्रीय प्रहरी समाचार कक्षका अनुसार कपिलवस्तु, दाङ, बागलुङ, पर्सा, खोटाङमा भएका छुट्टाछुट्टै सवारी दुर्घटनामा पाँच जनाको मृत्यु भएको हो ।

कपिलवस्तुको वाणगंगा नगरपालिका–१० मझौवास्थित सडकमा मोटरसाइकल दुर्घटना हुँदा एक जनाको मृत्यु भएको छ । लु.३८ प ४१४१ नम्बरको मोटरसाइकल दुर्घटना हुँदा चालक शुद्धोधन गाउँपालिका–४ बस्ने ३२ वर्षीय अक्रम हुसेनको मृत्यु भएको हो । दुर्घटनामा गम्भीर घाइते भएका उनको क्रिमशन अस्पताल मणिग्राम बुटवलमा उपचारको क्रममा मृत्यु भएको प्रहरीले जनाएको छ  । यस्तै दाङको गढवा गाउँपालिका–५ कक्रहवास्थित सडकमा अटो दुर्घटना हुँदा एक जनाको मृत्यु भएको छ । रा.१ ह ५९०४ नम्बरको अटो अनियन्त्रित भई दुर्घटना हुँदा अटोमा सवार राजपुर गाउँपालिका–३ भैसहवाका ५० वर्षीय तुलाराम विकको मृत्यु भएको हो । दुर्घटनामा गम्भीर घाइते भएका उनको राप्ती स्वास्थ्य विज्ञान प्रतिष्ठान घोराहीमा उपचारको क्रममा मृत्यु भएको हो । साथै दुर्घटनामा घाइते भएका अटोमा सवार १ जनाको सोही अस्पतालमा उपचार भइरहेको छ । अटो चालकलाई प्रहरीले नियन्त्रणमा लिएको छ ।

यस्तै बागलुङको गल्कोट नगरपालिका–८ जोईढुङ्गास्थित सडकमा बोलेरो पिकअप दुर्घटना हुँदा एक जनाको मृत्यु भएको छ । लु.३ च १८९१ नम्बरको बोलेरो पिकअप अनियन्त्रित भई दुर्घटना हुँदा बोलेरोमा सवार नवलपरासी पूर्व कावासोती नगरपालिका–३ बस्ने ५१ वर्षीय सुर्य बहादुर भण्डारीको मृत्यु भएको हो । दुर्घटनामा गम्भीर घाइते भएका उनको नगर अस्पताल गलकोटमा उपचारको क्रममा मृत्यु भएको प्रहरीले जनाएको छ । बोलेरो चालकलाई प्रहरीले नियन्त्रणमा लिएको छ ।

यस्तै खोटाङको केपिलासगढी गाउँपालिका–३ राखी तापखोलास्थित सडकमा सुमो दुर्घटना भएको छ । ना.१ ज ७१८१ नम्बरको सुमो दुर्घटना हुँदा सुमोमा सवार सोही गाउँपालिका–१ बस्ने ७३ वर्षीय दुर्गा प्रसाद राईको मृत्यु भएको हो । दुर्घटनामा गम्भीर घाइते भएका उनको जिल्ला अस्पतालमा उपचारको क्रममा मृत्यु भएको हो । सुमो चालकलाई प्रहरीले नियन्त्रणमा लिएको छ ।

यस्तै पर्साको वीरगंज महानगरपालिका–२५ बहुअरीस्थित सडकमा नम्बर नखुलेको सवारी साधनले मोटरसाइकललाई ठक्कर दिँदा  एक जनाको मृत्यु भएको छ । नम्बरको नखुलेको सवारी साधनले ना.२५ प ९०९१ नम्बरको मोटरसाइकललाई ठक्कर दिँदा मोटरसाइकलमा सवार बारा सुवर्ण गाउँपालिका–२ कवही टोल बस्ने प्रमोद मिश्राको छोरा १६ वर्षीय राज मिश्राको मृत्यु भएको हो । दुर्घटनामा गम्भीर घाइते भएका उनको नारायणी अस्पताल वीरगंजमा उपचारको क्रममा मृत्यु भएको हो । प्रहरीले मोटरसाइकल चालकलाई नियन्त्रणमा लिई हाल फरार रहेको सवारी साधनको खोजी गरिरहेको छ ।