काठमाडौं, एन्फा यू–१६ युथ लिगमा चर्च ब्वाइज युनाइटेडले विजयी सुरुवात गरेको छ । शुक्रबारदेखि सुरु भएको एन्फा यू–१६ लिगमा चर्च ब्वाइजले संकटाविरुद्ध २–१ को पुनरागमन जित हात पारेको हो ।

सातदोबाटोस्थित एन्फा कम्प्लेक्समा भएको उद्घाटन खेलमा पेम्बा तामाङले १५ औं मिनेटमा गोल गर्दै संकटालाई सुरुवाती अग्रता दिलाएका थिए । तर त्यो अग्रता लामो समयसम्म टिकेन । ३० औं मिनेटमा सुनिल मगरले चर्च ब्वाइजका लागि बराबरी गोल फर्काए । सुगम रानाले ८४ औं मिनेटमा गोल गर्दै चर्च ब्वाइजलाई २–१ को अग्रता दिलाए । त्यही गोल नै चर्च ब्वाइजको जितमा निर्णायक बन्यो । अखिल नेपाल फुटबल संघ (एन्फा) को आयोजनामा सुरु भएको यू–१६ युथ लिगमा शुक्रबारको अर्को खेलमा हिमालयन शेर्पा र मछिन्द्र क्लब खेलिरहेका छन् । त्यसपछिका खेलहरू भने पुस २१ देखि सुरु हुने एन्फाले जनाएको छ ।