पाल्पा, जिल्लाको बगनासकाली गाउँपालिका –५ राम्दीस्थित कालिगण्डकी नदी किनारमा लागु औषधसहित एक जना पक्राउ परेका छन् ।  झोला बोकी शंकास्पद अवस्थामा हिडडुल गरिरहेको अवस्थामा प्रहरी चौकी राम्दीबाट खटिएको प्रहरी टोलीले कास्की पोखरा महानगरपालिका–९ पृथ्वीचोकका २८ वर्षीय चोकबहादुर श्रेष्ठलाई लागुऔषधसहित पक्राउ गरेको हो ।

नदी किनारमा सफारी लेखेको निलो रङको पछाडी बोक्ने झोला भिरी पदैल हिडिरहेको अवस्थामा श्रेष्ठलाई पक्राउ गरी  खोजतलास गर्दा लागुऔषध फेला पारिएको जिल्ला प्रहरी कार्यालयका  प्रहरी नायव उपरीक्षक सुनिल मल्लले जानकारी दिए । प्रहरीले उनको झोलामा पत्रिकाले बेरी २ वटा पोको बनाई प्लाष्टिकको टेपले बेरी बाधी राखेको अवस्थामा नोफिन लेखेको ४६ एम्पुल, डाइजेपाम लेखेको ४६ एम्पुल, फेनेर्गान लेखेको ४६ एम्पुल गरी जम्मा १ सय ३८ एम्पुल लागु औषध फेला पारेको हो । श्रेष्ठलाई नियन्त्रणमा लिई जिल्ला अदालतबाट म्याद थप गरी आवश्यक अनुसन्धान  अगाडि बढाइएको जिल्ला प्रहरी कार्यालयले जनाएको छ ।