पाल्पा, गुल्मीको इस्मा गाउँपालिका– २ रातडाँडाका माधव पाण्डे ‘उत्कृष्ट गीतकार’का रुपमा पुुरस्कृत भएका छन् । भारतको राजधानी नयाँ दिल्लीमा भएको ‘इन्डो नेपाल सुजन म्यूजिक अवार्ड– २०२४’ मा उनी उत्कृष्ट गीतकारका रुपमा पुरस्कृत भएका हुन् । 
पाण्डेले ‘तिमी रैछौं बैगुुनी’ गीतबाट उत्कृष्ट गीतकारको पुुरस्कार हात पार्न सफल भएका हुन् । लामो समयदेखि भारतमा बसेर पनि नेपाली लोक संस्कृतिको संरक्षणमा उनले महत्वपूर्ण भूमिका निर्वाह गर्दै आएका छन् । 

लोक संस्कृतिको जर्गेना गर्ने उद्देश्यले आयोजना गरिएको उक्त कार्यक्रममा नेपाल र भारतका दर्जनौँ कलाकारको उपस्थिति रहेको थियो । सो अवसरमा अवार्डका विभिन्न विधामा विजेता कलाकारहरुलाई अवार्ड प्रदान गरिएको हो । उक्त कार्यक्रममा लोक दोहोरी गायिका एवम् मोडल रिया रेग्मी अवार्ड विजेता बनेकी छन् । रियाले ‘रहरै भो’ गीतबाट सर्वोत्कृष्ट नयाँ मोडलको अवार्ड हात पारेकी हुन् ।  कलाकारिता क्षेत्रमा प्रवेश गरेको २ वर्षमै रियाले यो अवार्ड लगायत धेरै सफलता हात पार्न सफल भएकी छन् । रियालाई वरिष्ठ गायिका शर्मिला गुरुङ र वरिस्ठ गायक इन्द्र जिसीले बेस्ट म्यूजिक भिडियो मोडलको अवार्ड प्रदान गरेका थिए । अवार्ड वितरणपछि विजेताहरुले अझै यस क्षेत्रमा थप लगनशिल हुँदै अगाडि बढने बताए ।

सुजन म्यूजिक प्रा.लि.की अध्यक्ष जमुना रानाले भारतमा नेपालीहरुको अवार्ड कार्यक्रम दोस्रो पटक आयोजना गरिएको बताइन् । सुजन म्यूजिक प्रा.लि.को आयोजनामा नेपाल र भारतमा रहेका संगीतकर्मीहरुको नेपाली गीत संगीतप्रतिको योगदानलाई सम्मान गर्न यसवर्ष पनि अवार्ड कार्यक्रम भएको हो । अवार्ड कार्यक्रमका लागि मनोनयन फाराम खुल्ला गरेर सम्पूर्ण प्रक्रिया पूरा गरि भोटिङमा धेरै मत प्राप्त गरेका व्यक्तित्वलाई विजयी घोषणा गरिएको थियो । सो अवार्ड कार्यक्रममा विभिन्न ३३ विधामा अवार्ड वितरण गरिएको थियो भने सांगीतिक क्षेत्रमा योगदान दिएका विभिन्न ब्यक्ति र स्रष्टाहरुलाई पनि सम्मान गरिएको छ । अवार्ड कार्यक्रमको नोमिनेशन नेपालमा भएको थियो भने फाइनल कार्यक्रम भारतको नयाँ दिल्लीमा भएको हो ।