गुल्मी, गुल्मीमा डोजरले फालेको ढुंगाले लागेर एक विद्यार्थीको मृत्यु भएको छ । जिल्लाको इश्मा गाउँपालिका–२ छल्दीटारामा जेसीबीले बाटो खन्ने क्रममा खसालेको ढुंगाले लागेर स्कूल जाँदै गरेकी ८ वर्षीया विष्णु कुमालको मृत्यु भएको हो ।

आइतबार बिहान विद्यालय हिँडेकी कुमाललाई लु १ क ४३८६ नम्बर जेसिबीले पल्टाएको ढुंगाले लागेको थियो । ढुंगाले लागेर बालिका गम्भीर घाइते भएकी थिइन् । घाइते उनको उपचारका लागि जिल्ला अस्पताल गुल्मीमा उपचारका  लगिएकोमा डाक्टरले मृत घोषणा गरेका जिल्ला प्रहरी कार्यालयले जनाएको छ । डोजरले छल्दीबाट हस्तीचौर जाने भित्री कच्ची सडक खन्ने क्रममा ढुगा पल्टिएको थियो ।   
डोजर चालक मकवानपुर इन्द्रचौर गाउँपालिका– ४ सिस्नेरीका ३६ वर्षीय राजेश रेग्मीलाई प्रहरीले नियन्त्रणमा लिएको छ । बालिकाले घर नजिकैको पालुखा माध्यमिक विद्यालयमा अध्ययन गर्दै आएकी थिइन् । अहिले बालिकाको शव गुल्मी अस्पतालमा राखिएको छ ।  घटनाबारे थप अनुसन्धान भइरहेको प्रहरीले जनाएको छ ।