पाल्पा, प्रजातन्त्र दिवसको अवसरमा जिल्ला स्वास्थ्य कार्यालय पाल्पाले निःशुल्क रुपमा स्वास्थ्य शिविर सञ्चालन गरेको छ । स्वास्थ्य शिविरमा सुगर, ब्लड प्रेसर, मृगौला परीक्षण तथा उचाई र तौल नाप जाँच गरिएको हो ।

नेपाल सरकारले सञ्चालन गरेको  नसर्ने रोगको प्रारम्भिक पहिचान, तथ्याङ्क संकलन र  रोकथामका लागि देशभर फागुन महिनाभरी ३० बर्षभन्दा माथी उमेरका सबै व्यक्तिहरुमा स्क्रिनिङ्ग कार्यक्रमलाई सफल बनाउन प्रजातन्त्र दिवसको अवसरमा शिविर सञ्चालन गरिएको स्वास्थ्य कार्यालयले जनाएको छ । 

अहिले नेपालमा नसर्ने रोग अन्तरगत  मधुमेह, उच्च रक्तचाप, मृगौला तथा उच्च तौल भएका रोगीहरुको संख्या दिन प्रतिदिन तिव्र रुपमा बढ्दै गएको छ । सरकारले, नसर्ने रोगलाई न्युनिकरण गर्नको लागि पाल्पाका १० वटै पालिकाका स्वास्थ्य चौकी, अस्पताल, जिल्ला तथा क्षेत्रिय अस्पतालहरुमा निशुल्क  सुगर, ब्लड प्रेसर, मृगौला परीक्षण तथा उचाई र तौल नाप जाँच गर्दै आएको छ ।  नागरिकहरुको परिक्षण तथा चेकजााच दर बढाउन, यो अभियानमा सफल बनाउन प्रजातन्त्र दिवसको अवसरमा समेत जिल्ला स्वास्थ्य कार्यालय पाल्पाले परिक्षण डेक्स स्थापना गरी, चिकित्सकको सहभागितामा निशुल्क रुपमा सुगर, ब्लड प्रेसर, मृगौला परीक्षण तथा उचाई र तौल नाप तथा परामर्श कार्यक्रम गरेको जिल्ला स्वास्थ्य कार्यालय पाल्पाका निमित्त प्रमुख टुक प्रसाद पोखरेलले बताए ।  
    

प्रजातन्त्र भनेकै जनतालाई खुसी, सुखी, निरोगी बनाउदै सम्बृद्धि बनाउने हो । बढ्दै गएको सुगर प्रेसर जस्ता जटिल दिर्घरोगको कारण अन्य रोग निम्तिने भएकोले आफु पनि चेकजाँच गरौ अरुलाई पनि चेकजाँचमा सहयोग गरौ, कोही पनि नछुटौ भन्ने अभियानका साथ सरकारले शुरु गरेको महाअभियानलाई सफल बनाउन  प्रजातन्त्र दिवसमा यो कार्यक्रम गरेको प्रमुख जिल्ला अधिकारी तोयनारायण सुवेदीले बताए ।   पाल्पा दरवार परिसरमा सञ्चालन गरिएको चेकजाँच तथा परिक्षण कार्यक्रममा जिल्लाका राजनितिक दल, कर्मचारी, नागरिक समाज, विभिन्न संघ संस्थाका प्रमुख तथा प्रतिनिधीहरु, पत्रकार, सुरक्षाकर्मीहरु तथा सर्बसाधारणहरुको सहभागिता रहेको थियो । चेकजाँचमा अधिकाश व्यक्तिहरुको शरिरलाई आवश्यकता भन्दा बढी तौल भएको, केही सुगर तथा प्रेसर बढी भएका व्यक्तिहरु भेटिएको परिक्षण कार्यमा सहभागी पाल्पा अस्पतालकी चिकित्सक डा. मिनुका कुमारी रजतले बताइन् । 

 पाल्पाको विभिन्न स्वास्थ्य संस्थामा पनि यो अभियान तीव्र रूपमा सञ्चालन भइरहेको छ । स्थानीय स्वास्थ्यकर्मीहरूले सेवाग्राहीहरूको स्वास्थ्य परीक्षण गर्दै आवश्यक सल्लाह सुझाव प्रदान गरिरहेका छन ।  स्वास्थ्य नै धन हो भन्ने भनाइलाई बलियो बनाउन, यस्तो स्क्रिनिङ्ग अभियानले नागरिकहरूलाई सचेत गराउनुका साथै समयमै रोग पहिचान गर्न सहयोग गर्नेछ ।