पाल्पा, जिल्लाको रामपुर नगरपालिकाले वडा नं. ९ मा एकीकृत घुम्ती शिविरमार्फत नागरिकलाई सेवा प्रवाह गरेको छ । नगरपालिकाको कार्यालयको पहुँच भन्दा टाढा रहेका नागरिकहरुलाई सहज रुपमा सेवा प्रदान गर्ने उद्देश्यले शिविरमार्फत सेवा प्रवाह गरेको हो ।

शिविरमा स्वास्थ्य परीक्षणसँगै नगरपालिका कार्यालयबाट प्रवाह हुने सेवा दिइएको थियो । नगरवासीको आवश्यकता तथा सेवामा सहजताका लागि शिविर सञ्चालन गरिएको रामपुर नगरपालिकाका प्रमुख प्रशासकीय अधिकृत सुर्य दर्शन पण्डितले बताए । उनले यही फागुन १२ गते वडा नम्बर १ मा पनि शिविर सञ्चालन गर्ने कार्यक्रम रहेको जानकारी दिए । यस वर्ष दुरीका हिसाबले टाढा रहेका तीन वडामा शिविरमार्फत सेवा प्रवाह गरिने उनले बताए । नागरिकहरुको सहजताका लागि नगरपालिका प्रतिवद्ध रहेको भन्दै आगामी दिनमा भौगोलिक हिसाव टाढा रहेका अन्य वडामा समेत शिविर सञ्चालन गर्ने योजना रहेको नगरपालिकाका प्रवक्ता कपिल बहादुर खाँणले बताए । शिविरमा हिउँदे अधिवेशनबाट बजेट रकमान्तर भएका योजनाको सम्झौता, बैंक खाता खोल्ने, जेष्ठ नागरिक परिचयपत्र, अपा· परिचयपत्र वितरण, पञ्जिकरण सेवा, व्यवसाय दर्ता तथा नविकरण, कृषि तथा पशु सेवा, आँखा, कान, घाँटी तथा दन्त परिक्षण सहित अन्य स्वस्थ्य परिक्षण सेवा प्रदान गरिएको थियो ।  आधारभूत स्वास्थ्य केन्द्र जब्गादीको प्रांगणमा भएको शिविरमा एकै दिन ६ सय १० सेवाग्राहीले सेवा लिएको वडा अध्यक्ष दिल बहादुर रानाले जानकारी दिए । शिविरमा स्वास्थ्य जाँच तथा ल्यावसेवा २ सय १३ जना, आँखा तथा कान जाँच ५ सय २२ जना, दन्त परीक्षण २ सय १५, सामाजिक सुरक्षा भत्ताको बायोम्याट्रिक ३२ जना, बेरोजगार व्यक्ति सुचिकरण सेवा ११ जना, अपा·ता तथा जेष्ठ नागरिक परिचयपत्र ११ जना, योजना सम्झौता ७ जना, व्यवसाय नविकरण ८ जना र बैंक खाता खोल्ने १४ जना, पशु सेवा १ सय ४५ र कृषि सेवा १ सय ८ जनाले सेवा लिएको  नगरपालिका योजना शाखा प्रमुख विक्रम बस्नेतले बताए । शिविरमा ३२ जना कृषकले माटो परिक्षण गराएका छन् । आँखा परीक्षण गराएका मध्ये ४ जनामा मोतियाविन्दुको समस्या देखिएको छ । 

रामपुर अस्पतालको समन्वयमा विशेषज्ञसहितको स्वास्थ्य जाँच, पाल्पा मेट्रोसिटी अस्पतालको समन्वमा सुगर प्रेसर जाँच र कालीगण्डकी आँखा उपचार केन्द्रको समन्वयमा आँखा तथा कान परिक्षण र आौषधी वितरण गरिएको स्वास्थ्य शाखा प्रमुख गिरिराज घिमिरेले जानकारी दिए । नगरपालिकाले यस अघि वडा वडा मै पुगेर चालू घुम्ती शिविर मार्फत आर्थिक वर्षमा सञ्चालन हुने योजनाको सम्झौता गर्नुका साथै बैंक खाता खोल्ने व्यवस्था मिलाएको थियो । नगरपालिकाले बैंक भन्दा पर रहेका नागरिकहरुलाई सामाजिक सुरक्षा भत्ता वडा र टोलबाट वितरण गर्दै आएको छ ।