पाल्पा, जिल्लाको रामपुर नगरपालिकाकी उपप्रमुख तथा न्यायिक समितिकी संयोजक बालकुमारी थापाले सभ्य र सु–संस्कृत समाज निर्माणका लागि सबैले पहल गर्नुपर्ने बताएकी छन्‌ ।

रामपुर नगरपालिका न्यायिक समितिको आयोजनामा वडा नं.३ रजघरामा भएको न्यायिक समितिसँग प्रहरी साझेदारी कार्यक्रमलाई सम्बोधन गर्दै उपप्रमुख थापाले यस्तो बताएकी हुन्‌ । उनले शान्त र सभ्य समाज निर्माणका लागि अपराधिक घटना न्यूनीकरण गर्नु पर्ने भन्दै त्यसका लागि सबैले पहल गर्नुपर्नेमा जोड दिइन्‌ । उपप्रमुख थापाले न्यायिक र शान्त समाज निर्माणका लागि विवादको समाधानसँगै अपराध अन्त्य हुनु पर्ने भन्दै विवाद, अपराधलाई कानुनी उपचारको माध्यमबाट समाधान गर्नु पर्ने धारणा व्यक्त गरिन्‌ । ३ का वडा अध्यक्ष दामोदर पाठकले जानेर वा नजानेर गरिने अपराधले समाजलाई हानी पुर्‍याउने भन्दै जुनसुकै भए पनि अपराध क्षम्य नहुने बताए । साथै अपराध नियन्त्रणका लागि सबै लाग्नुपर्नेमा उनले जोड दिए । कार्यक्रममा ईलाका प्रहरी कार्यालय रामपुर पाल्पाका प्रहरी निरिक्षक रामबहादुर नेपालीले जुनसुकै अपराधलाई कानुनी दायरामा ल्याउन आवश्यक रहेको बताए । यस्तै न्यायिक समिति सदस्य खेमराज अधिकारीले  पनि सभ्य र शान्त समाज निर्माणमा सबै लाग्नुपर्ने जोड दिए । कार्यक्रममा नेकपा एमाले रामपुर –३ का अध्यक्ष ईश्वरी खनालले विभिन्न अपराधजन्य घटनाको न्यूनीकरणका लागि सबै संयमित हुन आवश्यक रहेको बताए । कार्यक्रममा विभिन्न अपराध,लागु औषध,सडक सुरक्षा,साईबरक्राईम यसको कानुनी उपचार, न्यायिक समितिको काम, कर्तव्य र अधिकार लगायतका विषयमा अभिमुखिकरण प्रदान गरिएको थियो । कार्यक्रमको सहजिकरण ईलाका प्रहरी कार्यालय रामपुरका प्रमुख रामबहादुर नेपाली,रामपुर नगरपालिकाका न्यायिक समिति सचिवालय सचिव पार्वती परियारले गरेका थिए । रामपुर नगरपालिकाका उपप्रमुख तथा न्यायिक समितिका संयोजक बालकुमारी थापाको अध्यक्षता, समिति सदस्य खेमराज अधिकारीको स्वागत , सचिवालय सचिव पार्वती परियारको सञ्चालनमा कार्यक्रम  भएको  थियो ।