पाल्पा, नेपाल प्रहरीले अवैध लागूऔष ओसार–पसार गर्नेहरुलाई कडाई गर्दै आएको बताउँदै आए पनि यस्तो गतिविधि रोकिएको छैन् ।  अझै पनि सिमानाहरुबाट धमाधम अवैध लागूऔष ओसार–पसार गर्नेहरु भेटिने गरेका छन् ।

प्रहरीले माघ ४ गते देशका विभिन्न स्थानबाट अवैध लागूऔषधसहित १० जनालाई पक्राउ गरेको थियो । त्यसको एक महिनापछि फेरी एकै दिन ८ जना पक्राउ परे । केन्द्रीय प्रहरी समाचार कक्षका अनुसार बाँके, बारा, सुनसरी, मकवानपुर, कञ्चनपुर लगायतका विभिन्न ठाउँहरुबाट सोमबार ८ जनालाई अवैध लागूऔषधसहित प्रहरीले पक्राउ गरेको हो । प्रहरीले बाँकेको नेपालगंज उपमहानगरपालिका–१ बाट अवैध लागूऔषधसहित एक जनालाई पक्राउ गरेको छ । ब्राउनसुगर जस्तो देखिने पदार्थ २ ग्राम ७ सय ३० मिलिग्रामसहित सोही उपमहानगरपालिका–१४ बस्ने २३ वर्षीय विनय कोरीलाई प्रहरीले पक्राउ गरेको हो । लागूऔषध नियन्त्रण ब्यूरो शाखा कार्यालय नेपालगंजबाट खटिएको प्रहरीले उनलाई उक्त पदार्थ सहित पक्राउ गरेको जनाएको छ । यस्तै बाराको जीतपुरसिमरा उपमहानगरपालिका–२१ अम्लेखगंजबाट अवैध लागूऔषध गाँजासहित एक जना युवा  पक्राउ परेका छन् । करिब ५ किलो ९ सय ग्रामसहित पर्सा वीरगंज महानगरपालिका–१८ ईनर्वा बस्ने २१ वर्षीय राजकिशोर कुर्मीलाई प्रहरीले पक्राउ गरेको हो । यसैगरी कञ्चनपुरको कृष्णपुर नगरपालिका–५ गजरौलाबाट अवैध लागूऔषध खैरो हेरोइन जस्तो देखिने पदार्थसहित २ जनालाई प्रहरीले पक्राउ गरेको छ । पक्राउ पर्नेहरूमा सोही नगरपालिका–४ बस्ने २३ वर्षीय दिपेन्द्र बोगटी र २५ वर्षीय डेनी जोशी रहेका छन् । इलाका प्रहरी कार्यालय गुलरीया समेतबाट खटिएको प्रहरीले उनीहरूबाट करिब ९० मिलिग्राम खैरो हेरोइन जस्तो देखिने पदार्थ नियन्त्रणमा लिएको छ । यस्तै सुनसरीको धरान उपमहानगरपालिका–१६ बाट लागुऔषधसहित सोही ठाउँ डेरा गरी बस्ने धरान उपमहानगरपालिका–८ घर भएकी २९ वर्षीया सुस्मा तामाङलाई प्रहरीले पक्राउ गरेको छ । अस्थायी प्रहरी चौकी जोरसखुवाबाट खटिएको प्रहरीले उनको कोठा तलासी गर्ने क्रममा  लागूऔषध ट्रामाडोल ३ हजार २ सय १० ट्याब्लेट, स्पास्रुरेस्ट १ हजार ६ सय ६० ट्याब्लेट र स्पास्पेन ७ सय ३० ट्याब्लेट फेला पारी उनलाई पक्राउ गरेको हो । यस्तै मकवानपुरको हेटौंडा उपमहानगरपालिका–१५ रातोमाटेबाट नियन्त्रित लागूऔषध डाइजेपाम २८ एम्पुल, फेनारगन ५९ एम्पुल, नोर्फिन १३ एम्पुल सहित बकैया गाउँपालिका–४ छतिवन बस्ने २४ वर्षीय नबिन सुनारलाई पनि प्रहरीले पक्राउ गरेको छ । प्रहरी चौकी रातोमाटेबाट खटिएको प्रहरीले वीरगंजबाट चितवनतर्फ जाँदै गरेको ना.७ ख ११६ नम्बरको बसमा सवार उनलाई उक्त लागूऔषध सहित पक्राउ गरेको हो ।  कञ्चनपुरकै बेलौरी नगरपालिका–४ बेलौरी बजारबाट अवैध लागूऔषध खैरो हेरोइन जस्तो देखिने पदार्थ करिब १ ग्राम ४ सय ३० मिलिग्राम सहित २ जनालाई पनि प्रहरीले पक्राउ गरेको छ 

। पक्राउ पर्नेहरूमा सोही नगरपालिका–७ गणेशपुर बस्ने २४ वर्षीय खुशी राम राना र २२ वर्षीय देव राज राना रहेका छन् । लागूऔषध नियन्त्रण ब्यूरो शाखा कार्यालय धनगढी र इलाका प्रहरी कार्यालय बेलौरीबाट खटिएको प्रहरीले म.१ प ६०३० नम्बरको मोटरसाइकलमा सवार उनीहरूलाई उक्त पदार्थ सहित पक्राउ गरेको हो । मुलुकको प्रमुख नाकाहरुमा लागूऔषध ढुवानीकर्ता तथा प्रयोगकर्ता पक्राउ परेका केही प्रतिनिधि घटना मात्र हुन् यी । नेपालबाट गाँजा, चरेसजस्ता लागूऔषध भारत पुर्‍याइने गरेको पाइएको छ । प्रहरीले दैनिकजसो लागूऔषध प्रयोगकर्ता, ढुवानीकर्ता तथा कारोबारी पक्राउ गरे पनि ओसारपसारमा कमी आएको छैन । खास गरी साथीभाइको संगत, बेरोजगारी, परिवारको भूमिकामा कमी, पश्चिमा संस्कृतिको प्रभाव, लागूपदार्थको व्यापारबाट छिट्टै धनी बन्ने व्यापारिक चिन्तनका कारण नेपालमा लागूपदार्थको दुरुपयोग एवं अवैध ओसार–पसार बढ्दो छ ।