रामपुर (पाल्पा), कृषि, सहकारी तथा प्राकृतिक श्रोत समितिका सभापति कुसुमदेवी थापाले छिट्टै कृषक र साना बचतकर्ताहरुको हित हुने गरी ऐन आउने बताएकी छन् । रामपुर नगरपालिकाले गरेको स्वागत तथा अन्तक्र्रिया कार्यक्रममा बोल्दै उनले कृषक र साना बचतकर्ताहरुका लागि छिट्टै ऐन ल्याउने तयारी भएको बताएकी हुन् ।
सभापति थापाले हाल देखिएको कृषि र सहकारी क्षेत्रका समस्या समाधान गरि कृषक र साना बचतकर्तालाई प्रोत्साहन गर्ने गरी ऐन ल्याउन लागिएको उल्लेख गरिन् । उनले भनिन्,‘जबसम्म कृषक र साना बचतकर्ताको समृद्धि हुँदैन तब सम्म देशको समृद्धि सम्भव हुँदैज भन्ने कुरा सरकारले राम्रोसँग बुझेको छ ,त्यसैलाई ध्यानमा राखेर ऐन आउँदै छ ।’ सभापति थापाले सहकारी संस्थाहरु सहकारीको मर्म अनुसार चल्न नसकेको भन्दै सहकारीहरुमा व्याप्त समस्याको समाधान गर्ने नीति छिट्टै ल्याउने प्रतिबद्धता व्यक्त गरिन् । उनले कृषि क्षेत्रका लागि आफू चिन्तित रहेको भन्दै खाद्यान्नमा आत्मनिर्भर बनाई निर्यात गर्न सक्ने नीति अहिलेको आवश्यकता रहेको धारणा व्यक्त गरिन् । उनले कृषकहरुलाई परम्परागत कृषिखेति भन्दा बैकल्पिक र व्यवसायिक खेतीलाई बढावा दिन आग्रह समेत गरिन् । सभापति थापाले आवासक्षेत्र निर्माण गर्दा यसको कृषि उर्वर भूमिलाई मास्न नहुने बताइन् । उनले उर्वरभूमि रामपुरलाई सिंचाई र कृषिको माध्यमबाट अझ हराभरा बनाउनु पर्नेमा जोड दिइन् ।
कार्यक्रममा रामपुर नगरपालिकाका कार्यवाहक नगर प्रमुख तथा उपप्रमुख बालकुमारी थापाले कृषकको हितका लागि नगरपालिका प्रतिवद्ध भएर लागेको बताउँदै स्थानीय सरकारको सिमित स्रोत र साधनले प्रदान गरेको अनुदान कृषकका लागि पर्याप्त नभएको उल्लेख गरिन । उनले नेपाल सरकारले तोकेर पठाएका शसर्त अनुदानका कार्यक्रमलाई परिमार्जन गर्न आवश्यक रहेको पनि बताइन् ।
उपप्रमुख थापाले स्थानीय कृषकको समस्या र आवश्यकतालाई मध्यनजर गरेर कृषि सम्बन्धी कार्यक्रम सञ्चालन गर्न सके मात्र प्रभावकारी हुने धारणा व्यक्त गरिन् । उनले संघीय सरकारले प्रदान गर्ने अनुदान लगायत विभिन्न कार्यक्रमका बजेट स्थानीय तहमा स्वायत्त रुपमा सञ्चालन गर्ने नीति बनाउन सुझाइन् । साथै थापाले रामपुरमा कृषकले उत्पादन गरेका कृषि उपज संकलन गर्नका लागि कृषि उपज संकलन केन्द्र आवश्यक रहेकाले यसका लागि पहल गरिदिन समेत सभापति थापालाई आग्रह गरिन् । कार्यक्रममा रामपुर नगरपालिका –४ का वडाअध्यक्ष रामबहादुर रानाले समग्र कृषि र सहकारी क्षेत्रको विकासका लागि उचित नीति ल्याउन आवश्यक रहेको बताए । नगरपालिकाका सल्लाहकार देवराज ढकालले रामपुर फाँटको सिँचाईको एक मात्र स्रोत रामपुरफाँट सिँचाईको नहर जीर्ण रहेको भन्दै यसको पुनर्निर्माण र संरचनागत सुधारका लागि पहल गर्न आग्रह गरे । अर्का सल्लहाकार सन्दिप रानाले कालीगण्डकी डाइभर्सनले कालीगण्डकी वेशीका भू–भागको उर्वर भूमिलाई असर पार्ने र डाइभर्सन यस क्षेत्रको हित विपरित रहेकाले यसको विकल्प खोज्न पहल गर्नुपर्ने बताए । कार्यक्रममा नगरपालिका भित्रका अगुवा कृषकहरुले अनुदानका कार्यक्रम, बजारीकरण, प्रविधि सम्बन्धी समस्याका विषयमा गुनासो राखेका थिए । कार्यबाहक नगर प्रमुख बाल कुमारी थापाको अध्यक्षता,४ का वडा अध्यक्ष रामबहादुर रानाको स्वागत, कृषि शाखा प्रमुख नारायण प्रसाद गैरेको सञ्चालनमा कार्यक्रम भएको थियो ।
