तुलसीपुर(दाङ), तुलसीपुर उपमहानगरपालिका–१ काफलठुटाका नागरिक उपचारका लागि चार घण्टा हिँडेर स्वास्थ्य चौकी पुग्नुपर्ने अवस्था थियो । सडक सञ्जाल पनि प्रभावकारी नभएकाले यहाँका नागरिक हिँडेरै स्वास्थ्य संस्था पुग्नुपर्ने अवस्था थियो । 

“वर्षात्मा सडक सञ्जाल झन हुने कुरै थिएन, अन्य समयमा पनि दैनिक एउटा गाडी चल्छ, त्यो पनि प्रभावकारी छैन”, काफलठुटाका चेतबहादुर केसीले भने, “हिँडेरै स्वास्थ्य संस्था जाँदा चार घण्टा हिँड्नुपर्ने अवस्था थियो ।” आधारभूत स्वास्थ्य सेवा पाउन पनि निकै कठिन अवस्था व्यहोर्नु परेको तुलसीपुर–१ कै रानीटाकुरा निवासी तुलसी थापाले गुनासो गरे । “ज्वरो आयो, चोट पटक लाग्यो भने पनि सामान्य उपचार पाउन चार घण्टा हिँड्नुपर्ने अवस्था थियो”, उनले भने “तर, अब यो अवस्था हटेको छ ।” यस्तै समस्या रहेका तुलसीपुर–१ र ३ का विकट बस्तीलाई लक्षित गरी तुलसीपुर–१ को ठाँटीगाउँमा सामुदायिक स्वास्थ्य इकाइ सञ्चालनमा ल्याइएको छ । सोमबारदेखि यहाँ इकाइ सञ्चालनमा आएपछि विगत जस्तो चार घण्टा हिँड्नुपर्ने अवस्थाको अन्त्य भएको हो । हाल सञ्चालनमा आएको स्वास्थ्य इकाइमा पुग्न पनि केही बस्तीबाट दुई घण्टासम्म हिँड्नुपर्ने अवस्था भने रहेको तुलसीपुर–१ का वडाध्यक्ष हुमकान्त सापकोटाले बताए । उनका अनुसार वडा नं १ का रानीटाकुरा, गैरासिरे, काफलठुटा, चुरेघाँटी, तुलसीपुर–३ को थापापानी, पन्ननपुर, कालामारेजस्ता ठाउँबाट अझै पनि दुई घण्टा लाग्ने अवस्था हेरेको भन्दै सडक सञ्जाल विस्तार आवश्यक रहेकामा उनले जोड दिए । “पहिले चार घण्टा लाग्ने ठाउँमा ठाँटीगाउँमा स्वास्थ्य इकाइ स्थापना गरेपछि अब दुई घण्टा लाग्छ”, उनले भने, “सडक सञ्जाल भएमा सहज हुन्थ्यो ।” उक्त स्वास्थ्य इकाइमा एक अहेब, एक अनमी र एक जना कार्यालय सहयोगी कार्यरत छन् । स्थानीय दाता शेरबहादुर आलेले १० कठ्ठा जग्गा प्रदान गरेपछि सोही स्थानमा स्वास्थ्य इकाइ स्थापना गरिएको हो । जहाँ दुई सय ३० भन्दाबढी घरधुरीका एक हजार बढी नागरिक लाभान्वित भएका छन् । 

तुलसीपुर उपमहानगरपालिकाका प्रमुख टीकाराम खड्काले उक्त स्वास्थ्य इकाइलाई स्तरवृद्धि गर्नतर्फ ध्यान दिने बताउनुभयो । विकट क्षेत्रमा स्वास्थ्यको सहज पहुँच हुनुपर्ने भन्दै सोहीअनुरुप ठाँटीगाउँमा स्वास्थ्य इकाइ स्थापना गरिएको उनको भनाइ छ । “कहिल्यै हैजा, कहिल्यै कोभिडको महामारी हुन्छ”, उनले भने, “त्यस्तो अवस्थामा स्वास्थ्य चौकी नपुगी ज्यान गुमाउनुपर्ने अवस्था थियो, त्यो अवस्था अन्त्य गर्ने हाम्रो प्रयत्न हो ।” यो स्वास्थ्य इकाइ वडा नं १ को मात्र नभई वडा नं ३ का विकटका नागरिकलाई पनि सेवा प्रवाह गर्ने भन्दै आफूले स्वास्थ्य इकाइको आधा दायित्व पूरा गर्ने उनले प्रतिबद्धता जनाए । पवननगर स्वास्थ्य चौकी मातहत रहनेगरी उक्त स्वास्थ्य इकाइ सञ्चालन गरिएको हो ।