पाल्पा, चैत ७ गतेदेखि हुन लागेको यस वर्षको माध्यमिक शिक्षा परीक्षा अर्थात् एसइई परीक्षाको तयारी पाल्पामा पुरा भएको छ । शिक्षा विकास तथा समन्वय ईकाइ पाल्पाले प्रश्न पत्र र उत्तर पुस्तिका सम्बन्धित स्थानमा पुर्याउनेदेखि केन्द्राध्यक्षको नियुक्तिको काम सकेको छ । केन्द्र अध्यक्षका लागि आज अभिमुखीकरण हुँदै छ । ईकाइका प्रमुख प्रेमराज खरेलले अभिमुखीकरण बाहेक एसइईको सबै तयारी पुरा भएको बताए । उनले भने ‘परीक्षा केन्द्र, केन्द्राध्यक्ष तोक्नेदेखि प्रश्न पत्र, उत्तरपुस्तिका सम्बन्धित स्थानमा पुर्याउने काम सकिएको छ ।’
एक/दुई ठाउँका प्रश्न पत्र भने केन्द्राध्यक्षमार्फ सोमबार पठाइने छ भने केही ईलाका प्रहरी कार्यालयमा पठाइएको प्रमुख खरेलले बताए । उनले भने, ‘हामीले सोमबार सबै केन्द्राध्यक्षहरुलाई अभिमुखीकरण तालिम दिर्दै छौं, बाँकी काम सकियो ।’ परीक्षाको लागि २६ वटा केन्द्र निर्धारण गरिएको प्रमुख खरेलले जानकारी दिए । उनका अनुसार उक्त केन्द्रका लागि २६ जना केन्द्राध्यक्ष, ३० जना सहायक केन्द्राध्यक्ष, २ सय ४६ निरीक्षक, ५० जना परीक्षा सहायक, ९८ जना विद्यालय सहयोगी र ३ सय ९० जना सुरक्षाकर्मी परिचालन गरिएको छ । यो वर्ष ४ हजार ९ सय १० जना विद्यार्थीले परीक्षाको लागि रजिष्ट्रेशन भरेको शिक्षा विकास तथा समन्वय ईकाइले जनाएको छ । जसमा छात्र २ हजार ३ सय ५८ र छात्रा २ हजार ५ सय ५२ रहेका छन् । गत वर्षको तुलनामा यस वर्ष परीक्षा दिने विद्यार्थी भने बढेका छन् । यहाँ अघिल्लो वर्ष ४ हजार १ सय ८४ जना विद्यार्थी परीक्षामा सहभागी भएका थिए । जसमा नियमिततर्फ ४ हजार १२ र ग्रेडवृद्धितर्फ एक सय ७२ जना रहेको शिक्षा विकास तथा समन्वय ईकाइका परीक्षा शाखाका प्रमुख बमबहादुर थापाले जानकारी दिए ।
उनका अनुसार ग्रेडवृद्धिका विद्यार्थीहरु धेरै भएकाले यस वर्ष गतवर्ष भन्दा ७ सय २६ बढी विद्यार्थी सहभागी हुन लागेका हुन् । जिल्लाका १९ संस्थागत र १ सय २० सामुदायिक विद्यालयका विद्यार्थीहरुले परीक्षा दिदैं छन् । जसमा सामुदायिकतर्फ ४ हजार ३ सय ८९ विद्यार्थी परीक्षामा सहभागी हुने छन् । जहाँ २ हजार ४४ छात्र र २ हजार ३ सय ४५ छात्रा छन् । यस्तै संस्थागत विद्यालयका ५ सय २१ जना विद्यार्थीहरु मध्ये छात्र ३ सय १४ र छात्रा २ सय ७ जना रहेका छन् । नियमित अन्तगर्तत साधारणतर्फ ३ हजार ५ सय ४ जना विद्यार्थीहरु परीक्षामा सहभागी हुँदै छन् । जहाँ एक हजार ७ सय १५ जना छात्र र एक हजार ७ सय ८९ जना छात्रा रहेको जनाइएको छ । यस्तै प्राविधिकतर्फ २ सय २८ जना रहेका छन् । जहाँ एक सय ३ जना छात्र र एक सय २५ जना छात्रा रहेका छन् । यस वर्ष ग्रेडवृद्धिको साधारणतर्फ एक हजार एक सय ३० विद्यार्थी रहेका छन् । जसमा ५ सय १३ छात्र र ६ सय १७ जना छात्रा रहेका छन् । यस्तै प्राविधिकतर्फ ४८ जना रहेका छन् । जसमा छात्र २७ र छात्रा २१ छन् ।
जिल्लामा सबै भन्दा कम एक सय जना चन्द्र मावि चापपानी केन्द्र र सबै भन्दा बढी ३ सय ५० दरैठाँटी मावि रामपुर केन्द्रबाट परीक्षार्थी सहभागी हुँदै छन् । हरेक जिल्लाको प्रमुख जिल्ला अधिकारीको अध्यक्षतामा जिल्ला परीक्षा समन्वय समितिले आवश्यक शान्ति सुरक्षा परीक्षा सञ्चालन व्यवस्थापन अनुगमन गर्ने काम गर्नेछ । परीक्षालाई सभ्य एवं भव्य बनाउन परीक्षा समन्वय समितिले सबैलाई आग्रह गरेको छ । उसले परीक्षामा कुनै अमर्यादित गतिविधि हुन नदिन सबैलाई सचेत समेत बनाएको छ । परीक्षा चैत ७ देखि १९ गतेसम्म सञ्चालन हुने छ । परीक्षा तालिका अनुसार आगामी पहिलो दिन अनिवार्य अंग्रेजी, संस्कृतः वेदविद्याश्रमतर्फ– अनिवार्य संस्कृत रचना, अनिवार्य अंग्रेजी मदरसातर्फ – अनिवार्य अरेबिक भाषा अनिवार्य अंग्रेजी अनिवार्य संस्कृत भाषा र साहित्य (वेदविद्याश्रम तर्फ) अनिवार्य नेपालीको परीक्षा हुनेछ । परीक्षा बिहान ८ बजेदेखि ११ बजेसम्म चल्ने छ ।
