पाल्पा, पाल्पाको त्रिभुवन बहुमुखी क्याम्पसमा शान्तिपूर्ण र उत्साहजनकरूपमा स्वतन्त्र विद्यार्थी युनियन (स्ववियु)को निर्वाचन सम्पन्न भएको छ । विहान ८ बजेदेखि सुरु भएको मतदान ४ बजे सकिएको हो ।

हालसम्मको प्रारम्भिक विवरण अनुसार समग्रमा करीब ६४ दशमलव ८३ प्रतिशत मतदान भएको देखिएको छ । यहाँ एक हजार ८ सय ९४ जना मतदाता विद्यार्थी रहेकोमा एक हजार २ सय २८ मत खसेको निवर्तमान क्याम्पस प्रमुख टंक भट्टराईले जानकारी दिए । 

यहाँ १९ पदका लागि निर्वाचन भएको हो । १० पदमा प्रत्यक्ष निर्वाचनबाट नेतृत्व चयन हुनेछ । यस्तै ९ पदमा भने समानुपातिक मतबाट नेतृत्व चयन हुनेछ । प्रत्यक्षतर्फ अध्यक्ष, सचिव, कोषाध्यक्षसहित १० पदमा नेतृत्व निर्वाचित हुने छन् । यस्तै समानुपातिक उम्मेदवारका लागि सङ्गठनलाई मत दिनुपर्ने प्रावधान रहेको छ । सङ्गठनले पाएको मतको आधारमा स्ववियुमा प्रतिनिधित्व हुने निर्वाचन प्रमुख जीवनबहादुर थापाले बताए । यहाँ ४ बुथबाट मतदानको काम भएको थियो । अब केही बेरमा मत गणना हुने जनाइएको छ ।