पाल्पा, जिल्लाको तानसेनस्थित त्रिभुवन बहुमुखी क्याम्पसमा स्वतन्त्र विद्यार्थी युनियनको सभापतिमा अनेरास्ववियु क्रान्तिकारीका मिलन घर्ति मगर विजयी भएका छन् । बुधबार सम्पन्न अन्तिम मतगणनामा घर्ति मगरले कूल खसेको मतमा ३ सय ९० प्राप्त गरी विजयी भएका हुन् ।
उनका निकटतम प्रतिद्वन्द्वी नेपाल विद्यार्थी संघका कृष्ण अर्यालले ३ सय ४२ मत प्राप्त गरेको निर्वचन अधिकृत जीवन बहादुर थापाले जानकारी दिए । अन्य अधिकांस पदहरुमा भने नेपाल विद्यार्थी संघले विजयी प्राप्त गरेको छ ।
सचिवमा नेपाल विद्यार्थी संघका शुसिल बस्यालले अत्यधिक मतका साथ विजय प्राप्त गरेका छन् । उनले ५ सय १७ मत प्राप्त गरी निर्वाचित भए । उनका निकटतम प्रतिद्वन्द्वी अखिल क्रान्तिकारीका विपिन पंगेनीले ३ सय ३२ मत पाए । कोषाध्यक्षमा नेपाल विद्यार्थी संघकी मिस्मा रानाले ४ सय १६ मत पाइन् भने उनका निकटतम् प्रतिद्धन्द्धी गंगादेवी बाह्घरेले ३ सय ४५ मत पाएकी छन् ।
यस्तै सदस्यहरूमा नेविसंघका आशिका विश्वकर्माले ३ सय ९०,तोरण रास्कोटीले ३ सय ८७, नविन थापाले ३ सय ९८, बविता थापाले ४ सय ५, सुजल भट्टराईले ४ सय ५२, नेविसंघकै प्यानलबाट उम्मेदवारी दिएकी अखिल छैठौंकी ज्योति दर्लामीले ४ सय २६ र अखिल क्रान्तिकारीकी इच्छा थापाले ३ सय ६० मत प्राप्त गरी विजयी भएको निर्वाचन अधिकृत थापाले जानकारी दिए । यहाँ एक हजार ८ सय ९४ मतदाता रहे पनि १ हजार २ सय २८ मत खसेको थियो । १९ पदका लागि निर्वाचन भएको थियो । १० पदमा प्रत्यक्ष निर्वाचनबाट नेतृत्व चयन भएको हो । प्रत्यक्षतर्फ अध्यक्ष, सचिव, कोषाध्यक्षसहित १० पदमा नेतृत्व निर्वाचित भएको छ । यस्तै यस्तै ९ पदमा भने सङ्गठनले पाएको मतको आधारमा समानुपातिक सदस्य चुनिने छन् ।
