पाल्पा, पत्रकार हत्या र मिडियामाथिको सुनियोजित आक्रमणको विरोध गर्दै नेपाल पत्रकार महासंघ पाल्पा शाखाले जिल्ला प्रशासन कार्यालयमार्फत सरकारको ध्यानाकर्षण गराएको छ ।
महासंघले शुक्रबार काठमाडौँमा भएको आन्दोलनमा समाचार सङ्कलन गर्ने क्रममा ज्यान गुमाएका पत्रकार सुरेश रजक र सञ्चारगृहमाथिको भएको आक्रमणको सत्यतथ्य पत्ता लगाएर दोषीमाथि कडा कारवाहीको माग गर्दै सोमबार सरकारको ध्यानाकर्षण गराएको हो ।
महासंघको अगुवाईमा गएका जिल्लाका पत्रकारहरुले प्रमुुख जिल्ला अधिकारी तोयनारायण सुुवेदीलाई भेटेर राजतन्त्र पक्षधरहरूको प्रदर्शनका क्रममा भएको सुनियोजित आक्रमणप्रति खेद प्रकट गर्दै सरकारको ध्यानाकर्षण गराएका हुन् । पत्रकार महासंघ पाल्पा शाखाका अध्यक्ष कमलराज तिमिल्सेनाले प्रमुख जिल्ला अधिकारी सुवेदीमार्फत् सरकारलाई ध्यानाकर्षण पत्र बुझाए ।
ज्यान गुमाएका पत्रकारको हत्याबारे गहिरो अनुसन्धान गरी हत्यामा संलग्न सबैलाई फौजदारी अभियोगमा कारवाही गर्न तथा उनको परिवारलाई क्षतिपूर्ति दिन, सञ्चारमाध्यम र सञ्चारकर्मीमाथि आक्रमण गर्ने सबैलाई कानुनी कठघरामा ल्याउन तथा क्षति पुर्याइएका सञ्चारगृह र सञ्चारकर्मीलाई यथोचित क्षतिपूर्तिका साथै घाइते पत्रकारको उपचारको प्रबन्ध मिलाउन महासंघ पाल्पा शाखा जोडदार माग गर्दछ । विगतमा प्रेस तथा अभिव्यक्ति स्वतन्त्रता हनन्का घटनाहरूमा संलग्नहरूलाई तत्काल कानुनी कारवाही गर्न र भविष्यमा सञ्चारमाध्यम र सञ्चारकर्मीको सुरक्षाको उचित प्रबन्ध मिलाउन पनि महासंघले सरकारको ध्यानाकर्षण गराएको छ । महासंघको माग एक साताभित्रै सम्बोधन हुने विश्वसनीय आधार निर्माण गर्न प्रमुख जिल्ला अधिकारीमार्फत सरकारसमक्ष आग्रह गर्दै माग सम्बोधन नभए महासंघ सरकारविरुद्ध आन्दोलनमा उत्रन बाध्य हुने समेत चेतनावनी दिएको छ । ध्यानाकर्षण पत्र बुझ्दै प्रमुख जिल्ला अधिकारी सुवेदीले महासंघको माग जायज भएकाले गृहमन्त्रालयमार्फत सरकार समक्ष तत्काल ध्यानाकर्षण पत्र पठाईदिने बताए । उनले सरकारले सुरक्षा सतर्कता अपनाउँदा अपनाउँदै पनि घटना घट्नु दुखद् भएको उल्लेख गर्दै आफ्ना मागहरु शान्तिपूर्ण ढंगले राख्न पत्रकारहरुलाई आग्रह गरे ।
यही चैत १५ गते काठमाडौको तीनकुनेमा भिडियो खिच्ने क्रममा पत्रकार रजकको आगोमा जलेर ज्यान गएको छ भने हिंसात्मक प्रदर्शनका क्रममा अराजक समूहले कान्तिपुर टेलिभिजन, अन्नपूर्णपोस्टका कार्यालयमा ढुंगामुढा गर्नुको साथै हिमालय टेलिभिजनको सवारी साधनमा तोडफोड गरी क्षति पुर्याएको थियो । पत्रकार दिनेश गौतममाथि आक्रमण गरी खुट्टा भाँचिएको छ भने फोटो पत्रकार निराज तामाङको म्यामेरा हराएको लगायतका घटनाप्रति महासंघ गम्भीर भएको जनाएको छ । उक्त घटनाप्रति पाल्पासहित देशैभरका महासंघका शाखाहरुले सरकारको धयानाकर्षण गराएका छन् । प्रदेश समितिहरूले प्रदेश सरकारका गृहमन्त्रीलाई ज्ञापन बुझाएका छन् भने जिल्ला शाखाहरूले प्रमुख जिल्ला अधिकारीमार्फत् एकसाथ सरकारलाई ज्ञापनपत्र बुझाउँदै प्रेस स्वतन्त्रताको सुनिश्चतता गर्न माग गरेका छन् । महासंघले शनिबारदेखि नै आन्दोलनका विभिन्न कार्यक्रम गर्दै आएको छ । जसअन्तर्गत सोमबार पत्रकारहरूले देशभरिबाट कालोपट्टि बाँधेर काम गरेका थिए भने शनिबार सडकमा प्रदर्शन गरेका थिए ।
