६८औं राष्ट्रिय सहकारी दिवस आज देशैभर विभिन्न कार्यक्रम गरी मनाइँदै छ । वि.सं. २०१३ साल चैत्र २० गते चितवनको शारदानगरमा बखान सहकारी स्थापना भएको दिनलाई स्मरण गर्दै दिवस मनाउने गरिएको छ ।

सहकारीको अवधारणा अनुसार, सामूहिक आर्थिक उन्नति र सामुहिक कार्यशैली नै सहकारी अभियानको मुख्य उद्देश्य हो । नेपाली सहकारी अभियानको छाता संगठन राष्ट्रिय सहकारी संघले हरेक वर्ष दिवसको नारा तय गर्छ । यस वर्ष ‘मर्यादित सहकारीः समुन्नत समाज’ भन्ने नारा तय गरी राष्ट्रिय सहकारी दिवस मनाउन लागिको छ । नाराले सहकारी संस्थाहरूलाई पारदर्शिता, उत्तरदायित्व तथा सुशासनका आधारमा मर्यादित र अनुशासित रुपमा सुसञ्चालन गरी मुलुकको समुन्नत समाज निर्माणमा योगदान गर्नुपर्नेमा जोड दिएको छ ।

आजको दिन सहकारीको अवस्था र भए गरेका गतिविधिका बारेमा समिक्षा गर्ने दिन पनि हो । गत वर्ष सहकारी क्षेत्रले कति उत्पादन वृद्धि गरे, कतिमात्रामा आयात प्रतिस्थापन भयो र निर्यात बढाइयो ? सहकारीका कार्यक्रमले नाराको सारलाई समेट्न सके कि सकेनन् भन्ने कुरा समीक्षा हुन आवश्यक छ । विगतका नारा र दिवसले के कति परिमाणमा उपलब्धि दिन सफल भए यसको जवाफ तथ्यांकसहित दिन सकियो भनेमात्र सहकारी अभियानको सान्दर्भिकता बढ्न सक्छ । सहकारी जस्तो व्यावसायिक संगठनले सडक जुलुस वा सभा गर्नुपर्दैन, दिवसको अवसरलाई आफ्ना कामको प्रदर्शन गर्ने दिनका रूपमा मनाउनु राम्रो हुन्छ । उत्पादन वृद्धि गर्ने विभिन्न सम्भावनाको खोजी गरौँ, उद्यमशीलताको पहिचान र त्यसका लागि ज्ञान, सीप र पुँजी उपलब्ध गराउँ । सहकारीका माध्यमबाट रोजगारीका अवससर खोजौँ ।

सदस्यले गरेका उत्पादनको बजारीकरणका लागि सञ्जाल निमार्ण गरौँ । जल, जमिन, जंगल, जडिबुटी, प्राकृतिक तथा धार्मिक क्षेत्र तथा सम्भावनाको पहिचान, पर्यटन, रेमिट्यान्सलगायतका क्षेत्रको सही ढंगले उपयोग गरी आर्थिक, सामाजिक तथा वातावरणीय विकासका लागि काम गरौंँ । नवीनतम प्रविधिको प्रयोग गर्ने युवा जनशक्तिलाई अभियानमा आकर्षित गरौँ । यसो गर्न सकियो भने मात्र दिवस मनाउनुले सार्थकता प्राप्त गर्दछ । अन्यथा दिवस औपचारिकतामै सिमित बन्ने छ ।