पाल्पा, स्वास्थ्य तथा जनसंख्या मन्त्री प्रदीप पौडेलले स्वास्थ्य बिमा र सरकारी अस्पतालको सेवा व्यवस्थित गर्ने गरी सरकारले काम गरेको बताएका छन् । शुक्रबारदेखि तानसेनको टुँडिखेलमा सञ्चालन भएको दोस्रो तानसेन महोत्सवलाई उद्घाटन गर्दै मन्त्री पौडेलले यस्तो बताएका हुन् ।
स्वास्थ्य बिमाका लागि स्रोत सुनिश्चित गरी यसलाई व्यवस्थित र प्रभावकारी बनाउने योजनामा सरकार रहेको उनको भनाई छ । मन्त्री पौडेलले भने, “वर्तमान सरकार स्वास्थ्य क्षेत्रको विकास र सुधारलाई प्राथमिकतामा राखेर व्यवस्थित बनाउने योजनामा छ । बिरामीको उपचार सर्वसुलभ गर्ने र उपचार गर्न नसक्नेलाई निःशुल्क बनाउने तथा स्वास्थ्य बिमा कार्यक्रमलाई थप प्रभावकारी बनाउने छौँ ।” स्वास्थ्य क्षेत्रमा धेरै कुरा भएको तर पूर्ण नभएको उनले बताए । मन्त्री पौडेलले भने “ स्वास्थ्य क्षेत्र व्यवस्थित र पहुँच सहज हुन सकेको छैन, पहुँच नपुग्ने गरी भएको विकासले जनतालाई छुँदो रहेन छ, त्यसैले पहुँच पुग्ने स्थिति निर्माण गर्नका निम्ति हामीले उपचारात्मक क्षेत्रमा सुधार गर्दैछौं निरोधात्मक क्षेत्रलाई पनि विस्तार गर्ने गरी योजना ल्याएका छौं ।” उनले अस्पताललाई सुधार गर्ने र त्यसअनुसार व्यवस्थित गरेर अगाडि लिएर जाने प्रयत्न सरकारले गरिरहेको पनि बताए । अस्पताललाई व्यवस्थित गर्न बिमा व्यवस्थित हुन जरुरी रहेको भन्दै मन्त्री पौडेलले पहिलो कुरा नै बिमा व्यवस्थित बनाउने दिशामा मन्त्रालय लागेको उल्लेख गरे । आफू आमसर्वसाधारणले प्राप्त गरेका सुविधालाई कटाउने पक्षमा नभइ त्यसलाई सुरक्षित कसरी गराउनेतर्फ लागेको उनले स्पष्ट पारे । मन्त्री पौडेलले भने “केही व्यक्तिहरुले मलाई भन्ने गर्नुभएको छ , तपाईंले त बिमा बन्द गर्न लाग्नुभयो रे, यो विमा चल्दैन भन्नुभयो रे, मैले भनेको यसरी चल्दैन, मैले डुब्न लागेको बिमालाई उठाउन खोजेको, अव्यवस्थित बिमालाई व्यवस्थित बनाउन खोजेको, अपूर्ण बिमालाई पूर्णता तिर लिएर जान खोजेको हो, कार्यान्वयन हुने गरी हुन सक्ने गरी हामीले दृष्टिकोणहरू ल्याएका छौं, के –के गर्यौं भने बिमा सुरक्षित गर्न सकिन्छ, के–के गरे बिमामा नियमित आम्दानी गर्न सकिन्छ ? भन्ने कुराको परिकल्पना गरेका हौं ।”
उपचार कसरी गर्ने भन्ने बारेमा केही उपलब्धिहरु भए पनि त्यसले पूर्णता प्राप्त गर्न नसकेको उनले बताए । मन्त्री पौडेलले बिरामी बढाउने नभई बिरामी हुन नदिने उपाय कसरी खोज्न सकिन्छ त्यसअन्र्तगत कामहरु गर्न जरुरी रहेको उल्लेख गरे । उनले भने, ‘खासगरी बिरामी भएपछि उपचार कसरी गर्ने भन्ने बारेमा हामीले केही हदसम्म बहस गरिरहेका छौं । केही उपलब्धिहरु पनि भएका छन् तर त्यसले पूर्णता प्राप्त गर्न सकेको छैन । यसरी नै बिरामीको संख्या बढ्ने हो भने हामीले बिरामीहरुको उपचार गर्ने विषयलाई पूर्णतातिर होइन, अझ अपुग हुने स्थिती बन्छ । हामीले बिरामी बढाउने होइन, बिरामी हुन नदिने उपाय कसरी खोज्न सकिन्छ त्यसअन्र्तगत कामहरु गर्न जरुरी छ । हामीले निरोगी नेपाली अथवा नेपालीलाई रोग लाग्न नदिन के के उपाय अपनाउन सकिन्छ त्यसको लागि स्वास्थ्य मन्त्रालयले कोशिस गरिरहेको अवस्था छ ।’ कार्यक्रममा प्रतिनिधि सभा सदस्य ठाकुर गैरे, राष्ट्रिय सभा सदस्य राजेन्द्र लक्ष्मी गैरे, पूर्व उद्योग मन्त्री सोमप्रसाद पाण्डे, लुम्बिनी प्रदेशका सभामुख बसन्त घर्ती मगर, प्रदेश सांसद तथा पूर्व मन्त्री विरबहादुर राना, प्रमुख जिल्ला अधिकारी तोयनारायण सुवेदी, नेपाल पत्रकार महासंघ पाल्पाका अध्यक्ष कमलराज तिमिल्सेना, पाल्पा उद्योग वाणिज्य संघका अध्यक्ष शैलेन्द्र भट्टराई, पाल्पाका व्यापार सङ्घका अध्यक्ष विष्णु कार्की लगायतले महोत्सव सफलताको शुभकामना व्यक्त गरे । तानसेन नगरपालिका नगर प्रमुख सन्तोषलाल श्रेष्ठको अध्यक्षता, उपप्रमुख प्रतिक्षा सिंजालीको धन्यवाद, प्रवक्ता यादवसिं कार्कीको सञ्चालनमा उद्घाटन कार्यक्रम भएको थियो ।
