इमान सिं राना

पाल्पा(रामपुर) रामपुर क्रिकेट क्लव रामपुरले प्रतियोगितामा संकलन भएको रकम चितवनमा निर्माणाधिन गौतम बुद्ध अन्तर्राष्ट्रिय क्रिकेट रङ्गशालालाई सहयोग गरेको छ । क्लवले आयोजना गरेको दोस्रो आरसीसी टि–२० क्रिकेट प्रतियोगिताबाट संकलन भएको रकम मध्ये ३० हजार रुपैयाँ धुर्मुस सुन्तली फाउण्डेशनद्धारा निर्माण भैरहेको रङ्गशाला निर्माणका लागि सहयोग गरेको हो । गत पुस २७ देखि माघ २ गतेसम्म बेझाँडमा सञ्चालित प्रतियोगिताका लागि संकलन भएको रकम मध्ये खर्च कटाएर बचेको रकम चितवन पुगेर क्लवका पदाधिकारीहरुले फाउण्डेशनलाई प्रदान गरेका छन् ।

धुर्मुस सुन्तली फाउण्डेशनका अध्यक्ष सिताराम कट्टेल धुर्मुसलाई रकम हस्तान्तरण गर्दै रामपुर क्रिकेट क्लवका अध्यक्ष खुम बहादुर सारु थापाले देश कै गौरवको रुपमा निर्माण भैरहेको रङ्गशाला निर्माण अभियानमा जोडिन पाउँदा खुशी लागेको बताए । उनले रामपुर क्षेत्रमा क्रिकेटको विकासका लागि क्लव लाग्दै आएको बताउँदै यस पटकको प्रतियोगिता रंङ्गशाला निर्माणमा सहयोग गर्ने उद्देश्यले नै सञ्चालन गरिएको बताए । क्लवले आयोजना गरेको प्रतियोगितामा १४ समुहले सहभागीता जनाएका थिए । जसमा प्रतिकुल मौसमको कारण फाईनल खेल अवरुद्ध हुन पुगेको थियो । फाईनल खेल मौसमका कारण हुन नसके पछि गोलाप्रथाद्वारा विजेता उपविजेता चयन गरिएको थियो । प्रतियोगितामा मुस्ताफा क्रिकेट क्लव विजेता र वालिङ रक एक्सआई उपविजेता घोषित भएका थिए ।