पाल्पा, सिद्धार्थ राजमार्गअन्तर्गत तानसेन–बुटवल सडकखण्डको तानसेन नगरपालिका–८, गौडेपुल नजिकै पुनःपहिरो खसेको छ । शुक्रबाररातिदेखि सडक माथिबाट खसेको पहिरोका कारण बिहानैदेखि यातायात अवरुद्ध भएको छ, भने नालीमा रहेको ट्रक समेत पुरिएको जिल्ला प्रहरी कार्यालयले जनाएको छ । ट्रक पुरिए पनि मानविय क्षति भने भएको छैन ।

यस क्षेत्रमा खसेको पहिरोले शुक्रबार पनि सडक अवरुद्ध बनेको थियो । दिउँसो डोजर, स्काभेटर प्रयोग गरी सडक सुचारु गरिए पनि राति परेको अविरल वर्षले पुन पहिरो खसेको थियो । पहिरो खसिरहेका कारण पहिरो हटाउन समस्या भएको जिल्ला ट्राफिक कार्यालयले जनाएको छ । पहिरो पूर्ण रुपमा हटाउन अझै केही दिन लाग्न सक्ने भएकाले वैकल्पिक बाटो प्रयोग गरेर यात्रा गर्न जिल्ला प्रहरी कार्यालयले सबैलाई आग्रह गरेको छ । राजमार्ग अवरुद्ध भएसँगै पाल्पा, गुल्मी, स्याङ्जा, पोखरा तथा तराईका जिल्लाहरुबाट यात्रा गर्नेहरु बाटोमै अलपत्र परेका छन् ।