विष्णु पाण्डेय
पाल्पा । एक महिना अघिदेखि हराएका चापाकोट नगरपालिका ५ सेखाम स्याङ्जाका पंकज गिरी मृत अवस्थामा फेला परेका छन् । असार १८ गते देखि हराएका उनी खोजतलास गर्दै जाँदा भालुपहाडको फेदीमा मृत अवस्थामा फेला परेका हुन । लामो समयदेखि नभेटिएपछि उनको परिवारले असार २९ गते मात्र प्रहरीमा खोजीको लागि निवेदन दिएका थिए । पोखरामा बसेर अध्ययन गरिरहेका पंकज १८ गते भाडाको बुलेट बाइक सहित सम्पर्क विहिन भएका थिए । २९ गते परिवारले खोजीको लागि निवेदन दिए पछि स्याङ्जा र कास्की प्रहरीले उनको खोज अनुसन्धान गर्दै आएको थियो । आइतबार सेती खोलामा माछा मार्न गएका स्थानीयले निलो रंगको बुलेट बाइक देखे पश्चात् स्थानीयले प्रहरीलाई जानकारी गराएका थिए ।

बाइक दुर्घटना भएको हुन सक्ने र बाइक भेटिएको स्थान वरपर खोजी कार्य गर्दा मानव कंकाल भेटिएको थियो । मानव कंकाल नजिकै भेटिएको कपडाको आधारमा उक्त कंकाल पंकज गिरिको भएको परिवारले पुष्टि गरेको जिल्ला प्रहरी कार्यलय स्याङ्जाका प्रवत्ता प्रहरी नायव उपरीक्षक राजेन्द्र प्रसाद अधिकारीले जानकारी दिए । अहिले शवलाई जिल्ला अस्पताल स्याङ्जामा राखिएको छ । घट्ना बारे थप अनुसन्धान भैरहेको स्याङ्जा प्रहरीले जनाएको छ ।