पाल्पा, नेपाल रेडक्रस शोसाइटी पाल्पा शाखाको स्वर्णमहोत्सव मनाएको छ । नेपाल रेडक्रस सोसाइटी पाल्पाले शनिबार एक कार्यक्रमका साथ स्वर्णमहोत्सव मनाएको हो ।

कार्यक्रममा प्रमुख अतिथि तानसेन नगरपालिकाका प्रमुख अशोककुमार शाहीले स्मारिका विमोचन र स्वर्णमहोत्सव लोगो अनावरण गर्दै रेडक्रसले गरेका कामहरु धेरै नै प्रभावकारी रहेको बताए । उनले कोभिड–१९ को महामारीमा रेडक्रसको सक्रिय भूमिका रहेको र धेरै थोरै भएपनि आफ्नो क्षमताले भ्याएसम्म सबै स्थानीय निकायहरुलाई सहयोग गरेको बताए । प्रमुख शाहीले आगामी दिनहरुमा रेडक्रससँग सहकार्य गरेर काम गर्नको लागि तानसेन नगरपालिका सधँै तत्पर रहेको समेत जानकारी दिए ।
कार्यक्रममा स्मारिका प्रकाशन समिति संयोजक एवं कोषाध्यक्ष भीमसेन कार्कीले स्वागत मन्तव्य राख्दै स्मारीको सम्बन्धमा जानकारी गराएका थिए । पूर्वसभापति पूर्णमाया महर्जन, पत्रकार महासंघको उपसभापति भरत शर्मा, विशिष्ट सदस्य सकुन्तला बज्राचार्य, सल्लाहकार मेघराज शर्माले आ–आफ्नो भनाई राखेका थिए । कार्यक्रममा पत्रकार महासंघ, कृयाशील पत्रकारहरु, पाल्पा जिल्ला शाखाका पदाधिकारी, कार्यसमिति सदस्यहरु, सल्लाहकार, विशिष्ट सदस्यहरु, उपशाखा प्रतिनिधिहरु, शिक्षक नायकहरु, यूरेस, रेडक्रस कर्मचारीहरु तथा रेडक्रसकर्मीहरुको कार्यक्रममा उपस्थिती रहेको थियो । उपसभापति कृष्णराज अधिकारीले धन्यवाद मन्तव्य व्यक्त गरको कार्यक्रममा शाखा सभापति बुद्धिप्रसाद शर्माको सभापतित्व र मन्त्री केशवप्रसाद पौडेलको सञ्चालन रहेको थियो ।