पाल्पा । पछिल्लो समयमा कोरोना भाइरस संक्रमणमुक्त हुनेको संख्या बढ्दै छ । २४ घण्टामा एक हजार पाँच सय जना कोभिड–१९ कोरोना भाइरस संक्रमणमुक्त भएका छन् । स्वास्थ्य तथा जनसंख्या मन्त्रालयका अनुसार हालसम्म कोरोना संक्रमणबाट मुक्त हुनेको संख्या ९४.९ प्रतिशत पुगेको छ ।

स्वास्थ्य तथा जनसंख्या मन्त्रालयद्वारा आयोजित नियमित प्रेस ब्रिफिङमा प्रवक्ता डा.जागेश्वर गौतमले गत २४ घण्टामा देशभरका प्रयोगशालामा पाँच हजार १ सय ८१ नमूना परीक्षण गर्दा थप ८ सय ३० जनामा कोरोना भाइरसको संक्रमण पुष्टि भएको जानकारी दिए । योसँगै कूल संक्रमितको संख्या दुई लाख ४८ हजार ४ सय २३ पुगेको छ भने दुई लाख ३५ हजार ७ सय ३१ जना संक्रमणमुक्त भएका छन् । हालसम्म एक हजार ६ सय ९८ जनाको मृत्यु भएको स्वास्थ्य तथा जनसंख्या मन्त्रालयको भनाइ छ । हाल देशभरि १० हजार ९९४ जना सक्रिय संक्रमित छन् ।

प्रवक्ता डा.गौतमले कोरोनाले ल्याएको क्षति कम गर्न सरकारको प्रयास जारी रहेको बताउँदै खोपको आविस्कार भइसकेको र त्यसलाई नेपालमा पनि सर्वसुलभ उपलब्ध गराउने तयारी भइरहेको जानकारी दिए । मन्त्रालयका अनुसार विश्वमा सात करोड २१ लाख ७४ हजार ५८ जना कोरोनाबाट संक्रमित भएका छन् । त्यसमा निको हुनेको संख्या पाँच करोड, पाँच लाख ६२ हजार ९ सय ३८ रहेको छ ।