पाल्पा, देशभर थप १ सय ७१ जनामा कोरोना संक्रमण पुष्टि भएसँगै एक जनाको मृत्यु भएको छ । स्वास्थ्य तथा जनसंख्या मन्त्रालयका अनुसार मंगलबार देशभर १ सय ७१ जना कोरोना संक्रमित पुष्टि भएसँगै एक जना कोरोना संक्रमितको मृत्यु भएको हो । पछिल्लो २४ घण्टामा स्वास्थ्य तथा जनसंख्या मन्त्रालयका अनुसार २ हजार ९ सय ४६ जनाको पिसिआर परीक्षण भएकोमा १ सय ७१ जनालाई कोरोना पोजेटिभ देखिएको हो । मंगलबार १ सय ७१ जना थपिएकासँगै नेपालमा कोरोना संक्रमितको संख्या २ लाख ७१ हजार २ सय ८९ पुगेको छ ।

यसैगरी २४ घण्टामा थप एक जनाको मृत्यु भएको छ । नेपालमा कोरोना संक्रमणबाट हालसम्म मृत्यु हुनेको संख्या २ हजार ३० पुगेको छ । त्यसैगरी पछिल्लो २४ घण्टामा २ सय ५९ जना कोरोना संक्रमणबाट निको भएर डिस्चार्ज भएका छन् । योसँगै निको हुनेको संख्या २ लाख ६६ हजार ८ सय ५९ पुगेको छ । देशभरि सक्रिय संक्रमितको संख्या भने ३ हजार २ सय ३ छ । मन्त्रालयका अनुसार हालसम्म पिसिआर विधिबाट २० लाख ७८ हजार ९८ परीक्षणहरु गरिएका छन् । हालसम्म क्वारेन्टाइनमा रहनेको संख्या ९५ रहेको छ ।