पाल्पा, जिल्लाको निस्दी गाउँपालिका ४ पिपलभञ्ज्याङ स्थित मित्याल रामपुर भित्रि कच्चि सडक खण्डमा जीप दुर्घटना भएको छ । सोमबार विहान खदारबाट रामपुरतर्फ जाँदै गरेको ग १ ज ५७११ नम्वर जीप दुर्घटना भएको हो ।

दुर्घटनामा ७ जना घाइते भएका छन् । जीपमा चालक सहित नौ जना सवार रहेको बुझिएको छ । घाइते हुनेहरूमा निस्दी– ४ का ७० वर्षीय चुराबहादुर सुनारी, ६४ वर्षीय फत्त सिंह ठाडा, निस्दी– ३ की ४९ वर्षीया केसरी सोमै, ५८ वर्षीया तिलिसरा ढेङ्गा, ८० वर्षीय दल बहादुर डिसुवा, ५८ वर्षीया आति ढेङ्गा, ६० वर्षीया रानिसरा सोमै रहेका छन् । घाइते सबैलाई प्रहरी र स्थानीयले उद्धार गरी उपचारको लागि रामपुरमा पठाइएको जिल्ला प्रहरी कार्यालयले जनाएको छ । जीप सडकबाट करिब ५ मिटर तल सालको रुखमा कोल्टो परेको अवस्थामा रहेकाले ठूलो क्षति हुनबाट जोगिएको प्रहरीले जनाएको छ ।