पुरन राजकोटी मगर
गुल्मी (पुर्तिघाट),जिल्लाको कालिगण्डकी गाउँपालिकामा कोरोना संक्रमणको अवस्था भयावह बन्दै गएपछि स्थानीय युवाहरु त्यसको नियन्त्रण तथा रोकथामा जुटेका छन् । कालीगण्डकी गाउँपालिका कोभिड सहयोग सञ्जाल संस्थाको नेतृत्वमा उनीहरुले अभियान नै सञ्चालन गरेर कोरोना रोकथाम तथा नियन्त्रणमा जुटेका हुन् ।

गाउँपालिका भित्र विकराल बन्दै गएको महामारी नियन्त्रणमा स्थानीय सरकार एक्लैले नसक्ने भन्दै यहाँका युवाहरु स्थानीय सरकारलाई साथ दिदै महामारी नियन्त्रणमा जुटेका छन् । उनीहरुले ‘मेरो हजार मेरो जन्मभूमिलाई’ भन्ने अभियान नै सञ्चालन गरी कोरोना रोकथाममा स्थानीय सरकारलाई सहयोग गर्दै आएका छन् ।

गाउँपालिकामा बसोवास गर्ने, पेशा व्यवसायको सिलशिलामा गाउँभन्दा बाहिर रहेका नागरिकहरुबाट सहयोग रकम संकलन गरी युवाहरुले आवश्यक स्वास्थ्य सामग्री स्थानीय सरकारलाई सहयोग गरिरहेका छन् । उनीहरुले अभियानमार्फत संकलन गरेको रकमबाट पहिलो र दोस्रो चरणमा स्वास्थ्य सामग्री र औषधी खरिद गरी स्थानीय सरकारलाई दिएका छन् । एक औपचारिक कार्यक्रमका बिच स्वास्थ्य सामग्री र औषधी गाउँपालिका अध्यक्ष बेद बहादुर थापालाई हस्तान्तरण गरिएको कोभिड सहयोग सञ्जाल संस्थाले जनाएको छ ।

महामारीको बेला स्थानीय सरकार एक्लैले मात्र नसक्ने भएकाले गाउँका युवाहरु मिलेर सहयोग अभियान सञ्चालन गरिएको अभियान्ता सागर केसीले बताए । उनले भने‘ यो विपद्को अवस्थामा जिम्मेवार नागरिकको हैसियतमा हामीहरु टुलुटुलु बसेर हेर्न सक्ने अवस्था नभए पछि हामी स्थानीय सरकारलाई सहयोग गर्ने अभियानमा जोडिएका हौं ।’ आम नागरिकहरु कोरोना महामारीसँग लडिरहेको र कयौंले ज्यान गुमाईसकेको यो अवस्थामा आ–आफ्नो ठाउँबाट सहयोग गर्न समेत उनले सबैलाई आग्रह गरे । स्वास्थ्य सामग्री ग्रहण गर्दै गाउँपालिका अध्यक्ष बेद बहादुर थापाले विपद्को घडीमा युवाहरुले देखाएको सक्रियता,सहयोग र सद्भाव अत्यन्त प्रशंसनिय रहेको बताए । उनले स्थानीय सरकार कोरोना नियन्त्रणमा जुटिरहेको अवस्थामा युवाहरुले सहयोग गरेर थप उत्साह प्रदान गरिदिएकोमा उनीहरुलाई धन्यवाद दिएका छन् ।

पहिलो चरणमा युवाहरुले महामारीको अग्रभागमा रहेर काम गर्दै आएका स्वास्थ्यकर्मीहरुका लागि पीपीई ७ थान, पीपीई ग्राउण्ड सेट १० पिस,सर्जिकल मास्क १ हजार ७ सय ५० पिस,ग्लोब्स २ प्याकेट,फेस कभर ५० पिस,थर्मल गन ७ थान, अक्सोमिटर ७ थान सहयोग गरेका छन् । यस्तै उनीहरुले दोसो चरणमा पीपीई ७ थान र औषधि हस्तान्तरण गरेका छन् । उनीहरुले अभियानलाई निरन्तर जारी राख्ने बताएका छन् ।