पाल्पा, महिला नेतृ तथा सामाजिक व्यक्तित्व मिना पन्थीले स्वास्थ्य सामग्री र पौष्टिक आहार सहयोग गरेकी छन् । उनले जिल्लाका स्थानीय तहमा रहेका कोरोना संक्रमितहरुका लागि स्वास्थ्य सामग्री र पौष्टिक आहार सहयोग गरेकी हुन् ।

जिल्लामा कोरोना संक्रमण फैलिँदै गएपछि सामाजिक क्षेत्रमा क्रियाशील पन्थीले सुरुदेखिनै संक्रमितहरुलाई सहयोग गर्दै आएकी छन् । पहिलो लहरमा उनी आफै संक्रमित भएकी थिइन् । आफु संक्रमित भएपछि उनले संक्रमितहरुको मनोवल उच्च राख्नकै लागि भए पनि सहयोग गर्ने सोचका साथ जिल्लाका स्थानीय तहमा पुगेर संक्रमितहरुलाई सहयोग गर्दै आएकी छन् ।

लायन्स क्लबमा सक्रिय समेत रहेकी पन्थीले तानसेन, माथागढी, बगनासकालीका आइसोलेसनमा पुगेर पौष्टिक आहार वितरण गरेकी छन् । उनले संक्रमितको सुरक्षाका लागि मास्क, सेनिटाइजर, स्वास्थ्य सामग्री पनि सहयोग गरेकी छन् । नेतृ पन्थीले महामारीका बेलामा संक्रमित विरामीहरुको उपचार र मृतकहरुको शव व्यवस्थापनमा खटिदै आएका पाल्पा उद्योग वाणिज्य संघका उपाध्यक्ष यादव सिं कार्कीलाई समेत स्वास्थ्य सुरक्षा सामग्री हस्तान्तरण गरेकी छन् । उनले महामारीको अग्रभागमा खटिएका कार्कीलाई पिपिई ,माक्स ,सेनिटाईजर ,ग्लोब्स सहयोग गरेकी छन् ।

विश्वव्यापी रुपमा फैलिएको कोरोना महामारीबाट बच्न र बचाउनका लागि नागरिकहरुलाई केही भए पनि राहत मिलोस् भन्नका लागि पौष्टिक आहार र सुरक्षा सामग्री हस्तान्तरण गरेको नेतृ पन्थीले बताईन् । उनले कोरोना संक्रमितहरुबाट अन्य नागरिकहरुमा सर्ने सम्भावना प्रवल रहेकाले उनीहरुको सुरक्षाका लागि स्वास्थ्य सामग्रीले महत्वपूर्ण टेवा पुग्नेमा विश्वास व्यक्त गरिन् ।

विभिन्न सामाजिक संघसंस्थामा आवद्ध नेतृ पन्थीले पहिलो चरणको कोरोना महामारीका बेलामा पनि क्वारेन्टाईनमा रहेका नागरिकलाई सुरक्षा सामग्री र बन्दाबन्दीका कारण समस्यामा परेका दैनिक ज्यालादारी गरी जिवीकोपार्जन गर्दै नागरिकहरुलाई राहत स्वरुप खाद्यान्न सहयोग गरेकी थिईन् ।