पाल्पा, पाल्पाको रिब्दीकोट गाउँपालिका ४ मन्छिपमा पहिरोले घर पुरिदा एक युवकको मृत्यु भएको छ । निरन्तर परेको अविरल वर्षका कारण आज साझँ स्थानीय महेन्द्र भट्टराई क्षेत्रीको घर माथिबाट पहिरो खस्न गई घर पुरिदा उनका १९ वर्षीय छोरा मदन भट्टराईको मृत्यु भएको हो ।

घर माथिबाट झरेको पहिरोले घर पुरिन जाँदा घर भित्र रहेका भट्टराई पुरिन पुगेका थिए । उनलाई प्रहरी र स्थानीयको सहयोगमा तत्काल उद्दार गरी उपचारको लागि पाल्पा अस्पताल ल्याइएकोमा डाक्टरले मृत घोषणा गरेको जिल्ला प्रहरी कार्यालयले जनाएको छ । पहिरो साँझ ७ बजेको समयमा खसेको हो । परिवारका अन्य सदस्य घर बाहिर रहेकाले बच्न सफल भएको स्थानीयले बताएका छन् ।