पाल्पा, जिल्लाको तिनाउ गाउँपालिका ३ नाग मन्दिर स्थित सिद्धार्थ राजमार्गमा ढुङ्गा खस्दा मोटरसाईकल चालक घाईते भएका छन् । तीन दिनदेखि आएको पानीका कारण सडक माथिबाट ढुङ्गा खसेर लाग्दा मोटसाईकल चालक रेसुङ्गा नगरपालिका ८ का ४८ वर्षका महेन्द्र प्रसाद श्रेष्ठ घाईते भएका हुन् । बुटवलबाट गुल्मी तर्फ जाँदै गरेको लु १६ प.४६८६ नम्वरको मोटरसाईकल चलाएर आउदै गरेका श्रेष्ठलाई अकस्मात खसेको ढुङ्गाले लागेर घाईते भएको जिल्ला प्रहरी कार्यालयले जनाएको छ । उनको प्रादेशीक अस्पताल बुटवलमा उपचार भइरहेको र अवस्था मध्यम रहेको प्रहरी चौकी दोभानका प्रहरी नायव निरीक्षक बालबहादुर घर्ती मगरले जानकारी दिए । उनका अनुसार घटनाको थप अनुसन्धान भइरहेको छ ।