पुष्करराज रेग्मी

“गुरु आमा कथा सुनाउनुस् न ।” कक्षा ६ का विद्यार्थीहरुले भने ।

“हुन्छ , म आज तिमीहरुलाई अलि भिन्नै खाले कथा सुनाउँछु ल । ” अनिता गुरु आमाले भन्नु भयो ।

“कस्तो कथा गुरुआमा, सुनाउनुस् न ” सबैले भने । “म जात्रै जात्राको शहरको कथा सुनाउँछु ल !” गुरुआमाले भन्नु भयो र कथा सुनाउन लाग्नुभयो । हाम्रो देश नेपालमा एउटा पाल्पा जिल्ला छ । पाल्पाको तानसेन शहरमा जनै पूर्णिमाको दिनदेखि दश दिनसम्म जात्रा शुरु हुन्छ । जनै पूर्णिमाको दिन दिउँसो चुइँकीे निकालिन्छ । झ्यासी न्यासी झ्याइँ बाजा बजाउँदै , थोत्रो मादल बजाउँदै, बोराको कपडा लगाई च्यातिएको छाता ओढ्दै, खाली लट्टाइले हावामा चङ्गा उडाउँदै, खेलौनाको बच्चा नचाउँदै, खाली ऐना देखाउदै, विचित्र भेषभूषा लगाएका मानिसहरुले बजारको चोक चोकमा गई हाँस्य व्यङ्ग्य पाराले यमराजको सन्देश भनेर चुईँकी सुनाउँछन् । चुइँकीको अर्थ समाचार संपे्रषण गर्नु हो । यही दिन साँझ राती मृतकको सम्झनामा सम्बन्धित घर परिवारबाट कुनै सदस्य बिरुपको भई थोत्रो टीन लतारेर बजार परिक्रमा गर्दछन् । चुइकीको दिन गरिने क्रियाकलाप तानसेनको आफ्नै मौलिक साँस्कृतिक चलन हो ।

राजा प्रताप मल्लले काठमाडौंमा गाइजात्रा मनाउने चलन चलाए देखि नै पाल्पाका नेवार समुदायले तानसेनमा गाईजात्रा मनाउने चलन चलाएका हुन् । गाइजात्राको दिन विशेष गरी महिला मृतकको सम्झना काम्ले गाईका साथै जोगी, बासा, देवी देवताको स्वरुप बनाएर बजार घुमाइन्छ । निर्गुण भजन गाईन्छ । दरवारमा पु¥याईन्छ । दरवारमा पु¥याइनुको मतलव यसदिन यमराज दरवारमा बसेका हुन्छन् रे यसो गरिदा मृतकहरु सजिलै स्वर्ग जान्छन् भन्ने विश्वास छ । गाईजात्राको भोलिपल्ट रोपाइँ जात्रा देखाइन्छ । तानसेन बजारको सडक, चोक ,टुँडिखेल, दरवारमा असारे धान रोपिएको अभिनय गरिन्छ । रोपाइँ जात्रा कुनै वर्ष ५– ६ बटा समेत हुन्छ ,भने कुनै वर्ष १–२ वटा मात्र हुन्छ । पञ्चेबाजाको तालमा रोपाइँ गर्दै जात्रा समूहले यसरी गीत गाउँछन्् ।

असारे मासको दबदबे हिलो छि: मलाई घिन लाग्यो

पातली नानीलाई फरिया किन्दा छ विसे रिन लाग्यो ...

रोपाइँ जात्राको भोलिपल्ट बाघ जात्रा पर्दछ । बाघको रुपमा सिंगारिएको मान्छेलाई शिकारीहरुले घेरेको अभियनमा बाघ जात्रा देखाइन्छ । अचेल यो जात्रा हराउन थालेकोले संरक्षण गर्नुपर्छ भन्ने आवाज उठेको छ । यसैदिन श्रीनगरस्थित सिद्धि विनायक गणेश जात्रा र त्यसको भोलिपल्ट टक्सार टोल स्थित सूर्यविनायक गणेश जात्रा निकालिन्छ । अघिल्लो दिन जाग्राम बसीे भोलिपल्ट बाजागाजाका साथ गणेशको मूर्तिलाई खाटमा राखी बजार घुमाइन्छ । तानसेन बजार भित्र छ ठाउँमा गणेशका मन्दिरहरु छन् ।

टक्सार गणेश जात्राको भोलिपल्ट भिमसेन टोलबाट भिमसेन जात्रा निकालिन्छ । भिमसेन भनेका महाभारतका बलवान शक्तिशाली भिम हुन । शितलपाटीमा पनि एउटा भिमसेन मन्दिर छ । यसको जात्रा भने माघ महिनामा भीमा द्धादशीको दिन निकालिन्छ । तानसेन बजार भित्र मात्रै छ बटा भिमसेन मन्दिरहरु रहेका छन् । भिमसेन नेवारहरुका कूल देवता हुन् ।

भाद्र कृष्ण अष्टमीको दिन राती हुलाक चोकमा अस्थायी कृष्ण मन्दिर बनाई कृष्ण लिला देखाइन्छ । भोलिपल्ट कृष्ण जात्रा निकालिन्छ । यो कृष्ण जात्रा स्थानीय कृष्ण भक्तहरुले करीव तीस वर्ष अघिदेखि मौलिक रुपमा बनाउन लागेको हो । कृष्णाष्टमीको दिन राती भगवती मन्दिरमा जाग्राम बसिन्छ । देवी भगवती र श्रीकृष्ण दिदी भई भएको पौराणिक कथन रहेको छ । भगवतीको मन्दिरमा जाग्राम बस्दा भजन गाइन्छ । मध्यराती साइत अनुसार विधिपूर्वक पूजा गरी भगवतीको प्रतिमूर्ति बाहिर ल्याई खटमा राखिन्छ । यहि क्रममा घण्टाकर्ण ( गाँठेमंगल) को दिन जन्मेको लाखेलाई मध्यरातमा मारिन्छ । लाखे मार्नुको उद्देश्य दानव माथि देवीको जित हुनु र असत्य माथि सत्यको विजय हुनु हो ।

भोलिपल्ट अर्थात भाद्र कृष्ण नवमीको दिन राष्ट्रिय अदबका साथ भगवती जात्रा निकालिन्छ । भगवती जात्राको दिन भगवती मन्दिरको साथै तानसेन बजार भरिनै मान्छेको भीड हुन्छ । कति मान्छेहरु घरको छत, बार्दली र झ्यालहरुमा समेत हुन्छन् । दिउँसो एक बजे बन्दुक पड्काएर जात्रा निकालिन्छ । पितलको सुन्दर खटलाई तीन पटक मन्दिर परिक्रमा गराइन्छ । नेपाली सेनाद्वारा सलामी अर्पण गरिन्छ । सैनिक, प्रहरी, प्रशासन, प्राध्यापक, शिक्षक, विद्यार्थी, व्यापारी, स्थानीयवासी, भक्तजन सम्पूर्णको ठूलो उपस्थिति रहन्छ । भगवतीको खटभित्र पूजारी बसेका हुन्छन् भने परम्परा अनुसार कुमाल समुदायका जवानहरुले खट बोक्छन् । भगवती जात्रालाई श्री ७ रणउजिरेश्वरी भगवतीको जात्रा भनिन्छ । यो जात्राको शुरुवात आजभन्दा दुईसय वर्ष अघि कर्णेल उजिरसिंह थापाले अंगे्रजलाई जितेको खुशीयालीमा मन्दिर बनाई जात्रा निकालिएको हो । यो जात्रा पाल्पालीहरुको मात्र नभई नेपालीहरुको राष्ट्रिय पर्व हो ।

भगवती जात्राको भोलिपल्ट नारायण जात्रा पर्दछ । नारायण जात्रा कुनै वर्ष भगवती जात्रा कै दिन पर्दछ । विशेषः गरी भाद्र कृष्ण नवमीमा रोहिणी नक्षत्र परेको दिन यो जात्रा निकालिन्छ । यसरी पाल्पाको तानसेनमा दश दिनसम्म लगातार जात्रा हेर्न पाइन्छ । यसका साथै तिथि मिति अनुसार कालभैरव, बटुक भैरव, लक्ष्मी नारायण, हनुमान जात्राका साथै बौद्ध धर्मावलम्बीहरुले बुद्ध जयन्तीको अवसरमा बुद्ध जात्रा निकाल्छन् । यी सबै जात्राहरु हाम्रो इतिहास, संस्कृति र परम्परा हुन् । पाल्पा तानसेनको गौरवशाली ऐतिहासिक सांस्कृतिक गाथाहरु हुन् । यसैले पाल्पाको तानसेन जात्रै जात्राको शहर हो । सुन्नेलाई सुनको माला, भन्नेलाई फूलको माला, यो कथा सबैले कण्ठै पार्ला !