पाल्पा, नेपालमा पछिल्लो २४ घण्टामा थप १ सय ५८ जना नयाँ संक्रमित थपिएका छन् । आइतबार ६ हजार ६ सय ४ जनाको पीसीआर परीक्षण गर्दा १ सय ५४ र दुई हजार ३ सय १४ जनाको एन्टिजेन परीक्षण गर्दा चार जनामा कोरोना संक्रमण देखिएको हो ।

योसँगै नेपालमा कोरोना संक्रमितको संख्या नौ लाख १६ हजार ३ सय ५० पुगेको स्वास्थ्य तथा जनसङ्ख्या मन्त्रालयले जनाएको छ । पछिल्लो २४ घण्टामा ३ सय ४२ जना निको भएर घर फर्किएका छन् । योसँगै अहिलेसम्म कोरोना संक्रमणबाट निको हुनेको संख्या आठ लाख दुई हजार ३ सय ८९ पुगेको छ । मन्त्रालयका अनुसार हाल देशभर सक्रिय संक्रमितको संख्या ६ हजार ९ सय ६६ छ । जसमध्ये ६ हजार ५ सय ८९ जना होम आइसोलेशनमा र ३ सय ७७ जना संस्थागत आइसोलेशनमा छन् । कोरोनाका बिरामीमध्ये १ सय ७१ जना आइसीयूमा र ३३ जना भेन्टिलेटरमा उपचाररत छन् । १० वर्ष मुनिका तीन बालबालिकामा कोरोना संक्रमण पुष्टि भएको छ । पछिल्लो २४ घण्टामा कोरोना संक्रमणबाट दुई जनाको मृत्यु भएको छ । योसँगै नेपालमा कोरोनाबाट मृत्यु हुनेको संख्या ११ हजार ५ सय २३ पुगेको छ ।