पाल्पा, जिल्लाको रम्भा गाउँपालिकामा एमाले विजयी भएको छ । यहाँ नेकपा एमालेबाट अध्यक्ष र उपाध्यक्ष दुवै पदमा एमालेले विजयी हासिल गरेको हो । नेकपा एमालेबाट विष्णुप्रसाद भण्डारी अध्यक्ष र एमालेबाटै राधा कुमारी श्रेष्ठ उपाध्यक्षमा विजयी भएका छन् । सत्ता गठबन्धनका उम्मेदवारलाई पराजित गर्दै दोस्रो कार्यकालको लागि उनीहरु विजयी भएका हुन् ।

एमालेका उम्मेदवार भण्डारीले गठबन्धनका उम्मेदवार नेकपा एकीकृत समाजवादीका दुर्गाप्रसाद अधिकारीलाई एक हजार ४४ मत अन्तर पराजित गरेका छन् । एमालेका भण्डारीले ५ हजार ५ सय ८६ मत प्राप्त गरे भने अधिकारीले ४ हजार ५ सय ४२ मत ल्याए । उपाध्यक्षमा राधा कुमारी श्रेष्ठले गठबन्धनका उम्मेदवार नेपाली काँग्रेसका विष्णुकुमार थापालाई ६ सय ६१ मत अन्तरले पराजित गरिन् । उपाध्यक्ष श्रेष्ठले ५ हजार ७ सय १९ मत प्राप्त गरी निर्वाचित भएकी हुन् । नेपाली काँग्रेसका थापाले ५ हजार ५८ मत प्राप्त गरी पराजित भए । ५ वटा वडा रहेको यहाँ नेकपा एमालेले ३ वटा वडा र नेपाली काँग्रेसले २ वटा वडामा विजय हासिल गरेको छ ।